Dy turistë nga Belgjika kanë mbetur të bllokuar mesditën e sotme në zonën e njohur si “Qafa e Valbonës”, teksa po eksploronin Alpet shqiptare.
Sipas njoftimit të policisë, rreth orës 14:00 është marrë informacioni se turistët kishin ngecur për shkak të terrenit të thepisur dhe pranisë së dëborës, çka e bënte të pamundur vijimin e lëvizjes së tyre.
Menjëherë pas sinjalizimit, shërbimet e Komisariatit të Policisë Tropojë, në bashkëpunim me ekipin e kërkim-shpëtimit në Valbonë, organizuan ndërhyrjen dhe nisën kërkimet për lokalizimin e tyre.
Pas disa orësh kërkimesh në terren të vështirë malor, efektivët e policisë dhe ekipet e shpëtimit arritën të gjejnë dy turistët në zonën e “Qafës së Valbonës”.
Fatmirësisht, ata ndodheshin në gjendje të mirë shëndetësore dhe më pas janë transportuar dhe akomoduar në një bujtinë në Valbonë, ku po marrin ndihmën e nevojshme.
Turistët kanë falënderuar policinë dhe ekipin e kërkim-shpëtimit për reagimin e shpejtë dhe profesional.
Ndërkohë, Drejtoria Vendore e Policisë Kukës apelon për qytetarët dhe turistët që, në çdo rast emergjence, të kontaktojnë numrin pa pagesë 112.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
