Vendimi i Gjykatës Kushtetuese për ligjin e vetingut duket se ka kënaqur Ambasadën e Shteteve të Bashkuara të Amerikës dhe delegacioni i Bashkimit Europian në Tiranë.
Përmes një deklarate për mediat, dy selitë diplomatike e kanë mirëpritur këvendim, dhe theksojnë se tashmë prioriteti kryesor është zbatimi i vetingut, ligji më i rëndësishëm i paketës së reformës në drejtësi.
Ky ligj do të largojë nga sistemi gjyqtarët dhe prokurorët e korruptuar, thotë ambasada amerikane. Ndërsa nga ana tjetër, për BE-në, zbatimi i vetingut është kusht kryesor për hapjen e negociatave për anëtarësim të Shqipërisë.
Reagimi i ambasadës amerikane:
Ambasada e SHBA në Tiranë mirëpret vendimin e Gjykatës Kushtetuese për ligjin e vetingut. I bëjmë thirrje të gjitha partive politike të respektojnë vendimin e Gjykatës. Gjithashtu, nxisim udhëheqësit shqiptarë të punojnë me shpejtësi për të zbatuar të gjitha reformat historike të sistemit të drejtësisë në Shqipëri. Një reformë kuptimplotë që i largon gjykatësit dhe prokurorët e korruptuar nga sistemi gjyqësor gëzon mbështetjen e publikut të gjerë dhe është një prioritet kryesor i Shteteve të Bashkuara në Shqipëri.
Reagimi i delegacionit të BE:
Bashkimi Evropian i kushton vëmendje të veçantë vendimit të sotëm të Gjykatës Kushtetuese për shpalljen e ligjit të vetingut në përputhje me kushtetutën e Shqipërisë.
BE-ja i inkurajon autoritetet shqiptare të nisin me shpejtësi zbatimin e vlerësimit të gjyqtarëve dhe prokurorëve. Kjo është thelbësore për përparimin e procesit të anëtarësimit të Shqipërisë në BE dhe është pritur gjatë nga qytetarët shqiptarë.
Komisioni Evropian do ta mbështesë Shqipërinë për kryerjen e një procesi vetingu tërësor dhe të besueshëm, duke udhëhequr Operacionin Ndërkombëtar të Monitorimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
