Craig Melvin lançon biznesin familjar të qirinjve “Melvin Made”, të ardhurat drejt organizatave kundër kancerit

Prezantuesi i NBC dhe bashkëdrejtuesi i “Today Show”, Craig Melvin, ka shndërruar hobin e tij të prodhimit të qirinjve në një biznes të mirëfilltë familjar me mision bamirësie. Kompania e re, Melvin Made, do të lançohet më 2 dhjetor, në kuadër të Giving Tuesday, me të ardhurat që do të përfitojnë organizata të ndryshme që luftojnë kancerin.

Melvin, 46 vjeç, tha për People se ideja nisi si një hobi në kuzhinën e shtëpisë, por u kthye shpejt në pasion falë mbështetjes së familjes dhe historive personale me kancerin.

“Qëllimi është të rrisim ndërgjegjësimin për llojet e ndryshme të kancerit, të nxisim njerëzit të bëjnë kontrolle dhe të flasin për historinë e tyre familjare,” tha Melvin. “Të gjithë jemi prekur në një mënyrë apo tjetër.”

Koleksioni përfshin gjashtë aroma, të krijuara me vaj kokosi dhe esenca pa ftalate:

Southern Office, Lindsay, Hilton Head, Pink Jasmine, Betty Jo, dhe aroma sezonale Fireside Frankincense.

Pink Jasmine është një homazh për mbesën e Melvinit, Jasmine, e cila humbi jetën 3-vjeçare nga sarkoma Ewing.

Lindsay mban emrin e bashkëshortes së tij, gazetare Lindsay Czarniak, si edhe të atit të saj, mbijetues i kancerit tre herë.

Betty Jo nderon nënën e Melvinit, e cila ka mposhtur kancerin e gjirit.

Melvin tregon se rruga drejt perfeksionit nuk ka qenë e lehtë: “Qirinjtë e parë që bëra nuk ishin të mirë. Fitili nuk përputhej me enën, ose digjeshin shtrembër. Por jam tip që dua të bëhem i zoti në çdo gjë, ndaj mësova, lexova, madje gjeta edhe një mentor.”

Sipas People, familja Melvin ka humbur edhe vëllain e madh të Craig, Lawrence, nga kanceri i zorrës së trashë në vitin 2020, një humbje që forcoi edhe më shumë angazhimin e tij në kauzën ndaj kancerit.

Melvin organizon çdo vit turneun bamirës Bottoms Up Invitational, në mbështetje të Colorectal Cancer Alliance, e cila do të jetë një nga përfitueset e fondeve të Melvin Made.

“Nuk po kërkoj të fitoj para nga qirinjtë,” theksoi ai. “Por mund të mbledhim fonde që bëjnë ndryshim të vërtetë. E gjithë kjo është për të bërë sa më shumë të mira.”