Lufta në Ukrainë, rritet ndjeshëm çmimi i grurit

Çmimet e grurit janë rritur ndjeshëm në tregjet globale pasi Rusia tha se do t'i trajtonte anijet që shkojnë drejt porteve të Ukrainës si objektiva të mundshëm ushtarakë. Moska u tërhoq nga një marrëveshje këtë javë që kishte garantuar kalim të sigurt për dërgesat e grurit përmes Detit të Zi. Një zëdhënës i Shtëpisë së Bardhë akuzoi Rusinë se planifikon të fajësojë Ukrainën për sulmet ndaj anijeve civile. Presidenti rus Vladimir Putin tha se do t'i kthehej menjëherë marrëveshjes së grurit nëse kërkesat e tij plotësoheshin. Pas sulmeve të mëparshme ajrore rreth Odesës këtë javë, presidenti i Ukrainës Volodymyr Zelensky akuzoi Rusinë se synon qëllimisht infrastrukturën e eksportit të grurit dhe vë në rrezik vendet e cenueshme. Kievi u kërkoi vendeve të tjera në rajonin e Detit të Zi të ndërhyjnë për të siguruar kalimin e sigurt të anijeve të mallrave. “Nga ora 00:00 me orën e Moskës më 20 korrik 2023 [21:00 GMT e mërkurë], të gjitha anijet që lundrojnë në Detin e Zi drejt porteve të Ukrainës do të konsiderohen si transportues të mundshëm të ngarkesave ushtarake”, tha ministria ruse e mbrojtjes. Çmimet e grurit në bursën evropiane u rritën me 8.2% të mërkurën nga një ditë më parë, në 253.75 € (219.78 £) për ton, ndërsa çmimet e misrit u rritën me 5.4%. Kontratat e së ardhmes së grurit në SHBA u rritën me 8.5% të mërkurën, rritja e tyre më e lartë ditore që nga pushtimi i Ukrainës nga Rusia. Ministri ukrainas i Bujqësisë, Mykola Solskyi tha se sulmet kishin shkatërruar 60,000 tonë drithë dhe kishin dëmtuar pjesë të konsiderueshme të infrastrukturës së eksportit të grurit. Rusia filloi të shënjestrojë portet e Ukrainës në orët e para të së martës, pak orë pas tërheqjes së saj nga marrëveshja e grurit.