Media britanike “The Telegraph” i ka kushtuar një artikull vendimit të Komisionit të Posaçëm të Apelit për Imigrimin në Britaninë e Madhe, që la në fuqi sanksionet ndaj kreut të PD Sali Berisha, i cili është shpallur “non grata” nga Londra zyrtare.
Në shkrim flitet për një vendim gjykate në lidhje me padinë e Berishës. Po ashtu zbulohet se targetimi i Berishës ishte pjesë e një operacioni sekret, ku u përfshi "Home Office", dhe synohej goditja e bosëve shqiptarë të krimit që vepronin në Mbretërinë e Bashkuar.
"Ish-Presidentit të Shqipërisë i është ndaluar hyrja në Britani për lidhjet e tij të dyshuara me krimin e organizuar. Sali Berishës, i cili aktualisht është kreu i opozitës në vend, iu komunikua të hënën se apeli i tij kundër ndalimit të hyrjes në Britaninë e Madhe për arsye të sigurisë publike ishte refuzuar. Ai tani do të përballet me një ndalim të përjetshëm pasi Komisioni i Posaçëm i Apelit për Imigrimin zbuloi se ai kishte lidhje ‘të qarta’ me grupet e krimit të organizuar që përbënin një kërcënim për sigurinë publike në Mbretërinë e Bashkuar dhe Shqipëri. Home Office tha se ai kishte përdorur lidhjet për të fuqizuar ambiciet e tij politike dhe e akuzoi atë për përdorimin e pozitave të tij për t'u përfshirë në korrupsion dhe sjellje kriminale në mënyrë që të pasuronte veten dhe rrethin e ngushtë”.
“The Telegraph” shkruan se Berisha është njëri prej disa politikanëve ballkanikë, që u vendosën nën target, nga një operacion sekret i Ministrisë së Jashtme dhe Ministrisë së Brendshme, të koduar "Crime State Nexus" për të ndaluar bosët shqiptarë të krimit që vepronin në Mbretërinë e Bashkuar. 79-vjeçari Berisha, shkruan “The Telegraph”, përballet me akuza në Shqipëri se ai përdori ndikimin e tij kur ishte kryeministër midis viteve 2005 dhe 2009 për të favorizuar dhëndrin e tij në privatizimin e tokës shtetërore, akuza të cilat ai dhe vajza e tij i mohojnë.
"Ai u vendos në arrest shtëpiak në dhjetor, megjithëse prokurorët nuk kanë ngritur asnjë kallëzim penal. Vendimi i Britanisë për t’i ndaluar hyrjen z.Berisha nga vendi erdhi një vit pasi ai u përjashtua nga SHBA-të për korrupsion të dyshuar dhe abuzim me pushtetin. Berisha apeloi kundër vendimit në Komisionin e Posaçëm të Apelit për Imigrimin në Londër në mars, duke argumentuar se ai u ndalua nga Mbretëria e Bashkuar në bazë të pohimeve të rreme të paprovuara. Dokumentet vinin në dukje për keqpërdorimin e pretenduar të pushtetit kur ai ishte kryeministër, duke përfshirë emërimin e zyrtarëve të korruptuar, ndërhyrjen në sistemin gjyqësor të Shqipërisë për të mbrojtur vartësit nga hetimet dhe procedurat gjyqësore dhe mbikëqyrjen e paligjshme të kundërshtarëve politikë”.
Vihet në dukje se operacioni i përbashkët i Home Office-Foreign Office u krijua për të dobësuar kërcënimin nga grupet e krimit të organizuar dhe për të mbrojtur interesat e Britanisë në rajon.
"Gjykata u informua se lidhjet midis politikës dhe krimit në Ballkanin Perëndimor krijojnë një “mjedis lejues në të cilin kriminelët e rëndë dhe grupeve të krimit të organizuar, që mund të veprojnë dhe të përfitojnë nga mbrojtja politike e politikanëve të korruptuar nga aktivitetet e zbatimit të ligjit”. Kjo mbrojtje politike u siguron grupeve të krimit të organizuar rrugë shtesë për të pastruar paratë dhe u mundëson atyre të përdorin Shqipërinë si një "strehë të sigurt nga e cila mund të operojnë", thuhej në një dokument të Home Office. Në këmbim, grupet e krimit të organizuar do të ndihmojnë një politikan gjatë zgjedhjeve duke blerë vota dhe duke frikësuar votuesit”.
Berisha në një deklaratë tha:
"Nuk ka asnjë provë apo fakt për ndonjë veprim të kundërligjshëm. Unë mbetem i bindur se rruga e drejtësisë që do të vazhdoj do t'i shërbejë së vërtetës dhe do të godasë korrupsionin transnacional në atë mënyrë që meriton”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
