Dëmet pezull nga aksidentet, Mati: Vetting-u ka shkaktuar vonesa në gjykimin e çështjeve, kompanitë e sigurimeve përfitojnë nga rasti

Viti 2023 ka qenë mjaft pozitiv për bilancet e kompanive të sigurimeve. Ato kanë rritur ndjeshëm arkëtimet me mbi 8%, për një total prej rreth 228 milionë eurosh, por nuk janë rritur me të njëjtin ritëm dëmshpërblimet e paguara prej tyre. Këto të fundit janë rritur me 1.8%. Nga ana tjetër raportohet një numër shumë i lartë dëmesh të mbetura pezull në drejtim të të dëmtuarve.

Për avokatin Fatjon Mati kjo situatë është shkaktuar kryesisht për shkak të procesit të vetting-ut, e cila ka shkaktuar vonesa në gjykimin e çështjeve.

Përmes një lidhje “Skype” me studion e emisionit “MCN Economy”, Mati tha se kjo gjë shfrytëzohet në maksimum nga kompanitë e sigurive.

Më tej, Mati tha se ligji për sigurimet ka nevojë për ndërhyrje.

Ligji sapo është ndryshuar në vitin 2021, ka mangësitë e veta, ka nevojë për ndërhyrje, por nuk është ky problemi i vonesave. Vonesat kanë filluar menjëherë pas ligjit për vetting-un. Kur shteti ka ndërhyrë për vettingun e gjyqtarëve dhe prokurorëve, kjo ka shkaktuar vonesa në gjykimin e çështjeve dhe në ekzekutimin e rasteve të aksidenteve. Nëse ndodh një aksident automobilistik, ligji parashikon që do kryhen procedurat penale, për të iniciuar procesin për dëmshpërblim. Kompania nuk ka detyrim të paguajë dëmshpërblimin pa u ndarë fajësia dhe pa u përcaktuar kush janë fajtorët në një ngjarje.

Të gjitha këto, shkarkimi i prokurorëve dhe gjyqtarëve shkakton vonesa në dhënien e drejtësisë, për personat e dëmtuar. Kjo po shfrytëzohet nga kompanitë e sigurimit. Kompanitë shfrytëzojnë rastin dhe nuk ofrojnë realitetin e  vlerave financiaret për personat e dëmtuar.

Kompanitë kanë afro 3 muaj për të kthyer përgjigje për vlerën e dëmit. Ato ofrojnë një vlerë minimale sa i përket vlerës, çka një avokat i fushës, nuk e pranon dhe nuk mund t’ia propozojë klientit. Jemi gjendur para diskutimit me drejtuesit e kompanive të sigurimit ku thonë këto janë vlerat dhe thonë prisni apelin. Sistemi është në një lloj kolapsi.