Gjykata e Posaçme kundër Korrupsionit dhe Krimit të organizuar ka lënë në fuqi masën e sigurimit ‘arrest në burg’ të dhënë më herët në mungesë për Sajmir Kolaverin.
Ai u ekstradua një ditë me parë nga Italia, pasi ishte i shpallur në kërkim për dyshimet se është i përfshirë në vrasjen dhe zhdukjen e kufomës së Klevis Lleshit në vitin 2020 në Burrel.
Kolaveri dyshohet për veprat penale “vrasje për gjakmarrje”, “Fshehja ose asgjësimi i kufomës” grup i strukturuar kriminal, kryerja e veprave penale nga grupi i strukturuar kriminal dhe organizata kriminale.
44-vjeçari Kolaveri rezulton të jetë familjarë i Aurel Hoxhës i cili po ashtu është shpallur në kërkim për dyshimet si urdhërues i vrasjes së Klevis Lleshit.
Gjatë zhvillimit të seancës Sajmir Kolaveri nuk i ka pranuar akuzat e prokurorisë, duke pretenduar se s’ka lidhje me ngjarjen.
Megjithatë pretendimi i tij nuk ka bindur gjykatën e posaçme për t’i dhënë lirinë apo për ta lënë në një masë më të butë sigurie.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
