Në vijim të fushatës elektorale në Lushnjë, kryedemokrati Lulzim Basha, deklaroi se shpesh ka qenë dhe ka dëgjuar avokatinë e kandidatit Indrit Sefa, kur luftonte kundër padrejtësive, kundër shtypjes dhe privimit nga qeveria banditeske e Edi Ramës.
Ai tha se Sefa, është njeriu që do të punojë për Lushnjën, që nga familjet e vjetra themeluese të qytetit, e deri tek fermerët në cepat më të largëta të kësaj bashkie.
“Jam këtu sot para jush me zemrën plotë me krenari, që është Indrit Sefa, kandidati i Partisë Demokratike, është njeriu që do të punojë për qytetin, për bashkinë dhe për të gjithë lushnjarët. Që nga familjet e vjetra autoktone, themeluese të qytetit e deri tek fermerët në cepat më të largëta të kësaj bashkie kaq të rëndësishme për Shqipërinë dhe Ekonominë e saj”, u shpreh Basha.
Ai shprehu bindjen se zgjedhja e një njeriu jo vetëm me një fytyrë njerëzore, por me një moral dhe me një botëkuptim të ri është një avantazh i patejkalueshëm për Partinë Demokratike
Më tej tha se korrupsioni buron nga një fytyrë çnjerëzore e politikës, e cila nuk ka asnjë lidhje me hallet e përditshme të njerëzve dhe brengat e tyre.
“Kandidatja tjetër nuk ka çfarë të japë më përveç modelit të korrupsionit dhe bandave, sipas modelit të Edi Ramës. Është e shkuara dhe le të mbetet e shkuara. Ka vetëm një rrugë që vlerat me të cilat Lushnja krenohet, të ecë përpara, vota për PD dhe kandidatin e saj të dielën e 6 marsit, për të zgjedhur të ardhmen”, deklaroi Lulzim Basha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
