Edlira Harizi, anëtare e këshillit bashkiak të PD Durrës, foli në edicionin e lajmeve në MCN TV mbi kontejnerët që dyshohet të jenë me mbetje të rrezikshme, të cilat janë sekuestruar nga Prokuroria e Durrësit.
Harizi theksoi që Rrjeti i Bazelit ka kërkuar që analizat të bëhen në laboratorë jashtë Shqipërisë.
Ajo shtoi se në fund mbetjet duhet të dërgohen në landfille që janë të dedikuara për mbetjet toksike, të cilat në Shqipëri nuk ekzistojnë.
Harizi tha se heshtja e qeverisë flet për neglizhencën vrastare të saj, ministrive dhe instancave përkatëse.
“Anija është sekustruar. Prokuroria ka nisur verifikimin dhe hetimin për të parë si qëndron e vërteta me këto mbetje toksike, që transportohen në këto kontejnerë. Gjithë qytetarët kërkojnë transparencë, impakti në shëndetin e qytetarëve të Durrësit dhe fëmijëve tanë është i drejtpërdrejtë. Ato mbetje kanë qenë rifuxho, deri kur skandali u denoncua nga Rrjeti i Bazelit. Ato mbetje janë transportuar nën neglizhencën totale të shtetit dhe ministrive përkatëse. Rrjeti i Bazelit kërkon që analizat të bëhen në laboratorë jashtë Shqipërisë që të merren të dhëna të sakta, dhe të bëhet protokolli i duhur, që të dërgohen në landfille të dedikuara për mbetje toksike. Në Shqipëri s’ka landfille të tilla. Heshtja e qeverisë është e qartë, tregon që ato kanë qenë prej kohësh aty dhe është një neglizhencë vrastare. Heshtja është për të mbrojtur ata që kanë bërë trafikun, se kush janë organet kompetente që duhet t’i gjejnë dhe t’i shkojnë deri në fund”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
