Goditet një bazë armatimi në Tiranë, në kërkim poseduesi, arrestohet nëna e tij

Goditet një bazë armatimi që dyshohet se shërbente për furnizimin e grupeve kriminale.

Shpallet në kërkim poseduesi i bazës së armatimit, ndërkohë që vihet në pranga nëna e tij, 66 vjeçe.

Si rezultat i administrimit të shpejtë të informacioneve të siguruara në rrugë operativo-ligjore, se në fshatin Picallë mbahej një bazë armatimi me qëllim shitjen e armëve për grupe kriminale, shërbimet e Policisë organizuan dhe finalizuan operacionin e koduar “Picalla”.

Gjatë operacionit u bë i mundur identifikimi dhe goditja e kësaj baze armatimi. 

Nga kontrolli i ushtruar në banesën e shtetasit O. Q. u gjetën dhe sekuestruan 5 armë zjarri automatike, 1 pushkë, 3 pistoleta, 1 armë gjahu, 1 bajonetë, silenciator, uniforma dhe pajisje të ngjashme me ato të Policisë, si dhe rreth 900 fishekë luftarakë të kalibrave të ndryshëm, fitila zjarrpërcjellës dhe kapsolla detonatore.

Në vijim të veprimeve, u arrestua në flagrancë shtetasja M. H., 66 vjeçe, banuese në Tiranë, ndërsa u shpall në kërkim shtetasi O. Q., 41 vjeç, banues në Tiranë.

Armët do të dërgohen në Institutin e Policisë Shkencore për ekspertizë, me qëllim verifikimin e përdorimit të tyre në ngjarje kriminale.

Vijon puna për kapjen e shtetasit të shpallur në kërkim dhe për dokumentimin e plotë të kësaj veprimtarie kriminale.