Avokati Erind Mërkuri i ftuar në studion e MCN, ka treguar se si do të jetë ecuria e çështjes së ish-gjyqtares Altina Xhoxhaj të cilës nuk iu pranua ankesa nga Dhoma e tretë pas shkarkimit nga organi i Vettingut në Shqipëri, KPH dhe KPA.
"Çështja Xhoxhaj përfundoi në shkurt të vitit 2021 ku dhoma e 3 e kësaj gjykate dha vendimin në mos pranimin e ankesës të paraqitur nga ky individ, pasi është shkarkuar nga organet e Vettingut në Shqipëri, Komisioni i Pavarur i Hetimit dhe Kolegji i Posaçëm i Apelimit.
Vendimet që jep Gjykata e Strasburgut janë gjithmonë përfundimtare, por megjithatë lejohet që në Gjykatë të paraqitet një hetim dhe që njihet si Dhoma e Madhe e Gjykatës Europiane të Drejtave të Njeriut.
Dhoma e Madhe përbehet jo nga të gjithë gjyqtarët, përbëhet nga kryetarët e secilës dhomë dhe një nga gjyqtarët për secilën dhomë dhe arrihet në total prej 16 gjyqtarësh që kanë mundësi të rishikimit të vendimit të marrë në një nga dhomat e kësaj gjykate.
Nuk mund të rishqyrtojnë çdo çështje, pra nuk është një shkallë ankimore brenda gjykatës. Ato i kalojnë një filtri ku një kolegj prej 5 gjyqtarësh të tjerë vlerësojnë nëse janë apo jo kushtet e parashikuara nga Konventa dhe Rregullorja e Gjykatës.
Kolegji analizon nëse çështja ka një interes publik të përgjithshëm në interpretimin e normave të Konventës. Në rastin konkret i bie që kolegji ka vlerësuar se zgjidhja e dhënë nga Dhoma e tretë ka qënë optimale dhe nuk ka nevojë për rishikim të mëtejshëm. Kjo do të thotë që vendimmarrja e Dhomës së 3-të është një precedent që Strasburgu duhet të ndjekë në të gjitha rastet e tjera që kanë të bëjnë me Shqipërinë për procesin e Vettingut.", u shpreh Mërkur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
