Nga Rrogozhina ku ndoqi nga afër procesin zgjedhor, Komisioneri Shtetëror Zgjedhor, Ilirjan Celibashi kërkoi që qytetarët të mos tregojnë votën e tyre dhe të mos bien pre e joshjes së partive politike. Ai deklaroi se procesi i votimit po shkon mirë, por sërish ngriti disa problematika. “Votuesit të shmangin çdo lloj joshje nga subjektet për ti treguar se për kë kanë votuar. Kandidatët duhet të evitojnë deklarimet e tyre me përmbajtje elektorale. E kanë të ndaluar të bëjnë thirrje për të votuar dhe nuk kanë asnjë arsye ligjore dhe për të vëzhguar qendrën e votimit. Aty janë vëzhguesit dhe mediat”, tha Celibashi. Ai kujtoi se fotografimi i votës është shkelje e rëndë e Kodit Zgjedhor, dhe se një problematikë e tillë do të adresohet. Ndër të tjera, Celibashi kërkoi që të shmanget votimi familjar. Ditën e sotme qytetarët e Rrogozhinës të rivotojnë për zgjedhjen e kryebashkiakut pasi Kolegji Zgjedhor shpalli të pavlefshme zgjedhjet e 14 majit. Zgjedhjet e sotme do të kenë vetëm një fletë votimi, atë për kryebashkiakun mes socialistit Edison Memolla dhe kandidatit të koalicionit “Bashkë Fitojmë”, Shkëlqim Hoxha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
