Braçe dhe Manja, propozime për ndryshime në Kodin Rrugor/ Kërkohet ashpërsimi i masave për shoferët e rinj

Deputetët e Partisë Socialiste, Ulsi Manja dhe Erion Braçe, kanë propozuar amendamente të reja në Kodin Rrugor, të cilat parashikojnë masa më të ashpra për drejtuesit e mjeteve, veçanërisht për shoferët e rinj dhe ata që shkelin rregullat e qarkullimit nën efektin e alkoolit. 

Sipas ndryshimeve të propozuara, çdo person që kapet duke drejtuar automjet pa patentë nuk do të mund të pajiset me leje drejtimi për një periudhë 1-vjeçare, përveç përgjegjësive penale që parashikon ligji aktual. 

Një tjetër masë prek të miturit që kapen në timon pa patentë. 

Ata nuk do të mund ta marrin lejen e drejtimit sapo të mbushin moshën 18 vjeç, por do të duhet të presin deri në moshën 20-vjeçare. 

Amendamentet parashikojnë gjithashtu rregulla më të forta për shoferët e rinj. 

Gjatë vitit të parë pas marrjes së patentës, niveli i lejuar i alkoolit në gjak do të jetë zero. 

Po ashtu, drejtuesit me eksperiencë deri në 2 vite nuk do të lejohen të qarkullojnë nga ora 24:00 deri në 06:00, përveç rasteve kur shoqërohen nga një person i rritur që disponon patentë prej të paktën 3 vitesh.

Për shoferët e rinj janë propozuar edhe kufizime të reja shpejtësie: deri në 90 km/h në autostradë; deri në 80 km/h në rrugët jashtë zonave të banuara. 

Shkelja e këtyre kufijve do të ndëshkohet me gjobë nga 5 mijë deri në 15 mijë lekë, pezullim të patentës për 1 muaj dhe heqje pikësh. 

Sipas draftit, nëse shoferi i ri nuk kryen shkelje gjatë vitit të parë, kufizimet hiqen automatikisht. Por nëse kryen dy shkelje, periudha e provës zgjatet edhe me një vit tjetër. 

Ndryshimet e propozuara ndalojnë edhe përdorimin e celularit gjatë drejtimit të biçikletave dhe motorëve elektrikë. Një nga masat më të ashpra lidhet me drejtimin e mjetit në gjendje të dehur. 

Drafti parashikon që çdo drejtues që kapet përsëritës me nivel alkooli mbi 0.5 gram/litër në gjak, pasi është ndëshkuar më parë për të njëjtën shkelje, do të humbasë përgjithmonë patentën.