Franca po përjeton rënien e ndjeshme të numrit të duhanpirësve. 1 milion persona kanë hequr dorë nga cigarja në periudhën 2016-2017. Një rënie e tillë nuk ka ndodhur për të paktën një dekadë, bënë të ditur autoritetet franceze të shëndetit publik.
Rënia e numrit të duhanpirësve është regjistruar edhe te adoleshentët dhe personat me të ardhura nën mesataren.
Studimi që nxori këto rezultate e shpjegon rënien me masat antiduhan që Franca ka marrë së fundmi, të tilla si paketimi neutral, rimbursimi për ata që përdorin alternativa më të shëndetshme se duhani, rritja e çmimit të cigareve dhe fushatat antiduhan.
Sipas studimit, në vitin 2017, ishin 26.9% duhanpirësit e moshës 18-75 vjeç; ndërkohë që një vit më parë, kjo shifër qëndronte në 29/4%. E përkthyer në numra, kjo do të thotë që nga 13.2 milionë në vitin 2016, vitin e kaluar ky numër ka shkuar në 12.2 milionë.
Në rang global, shifrat tregojnë se pavarësisht politikave antiduhan, rritja e numrit të popullsisë ka shkuar paralel me rritjen e numrit të duhanpirësve.
Duhanpirja bëhet shkak për vdekjen e 1 personi në dhjetë, gjysma e të cilëve në katër vende: Kinë, Indi, SHBA dhe Rusi.
Ajo që mbetet shqetësuese është fakti se epidemia e duhanit po “eksportohet” nga vendet e pasura në ato mesatare dhe të varfra.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
