Një operacion i zhvilluar me urdhër të SPAK ka çuar në pranga dy “ushtarë” të Ervis Martinajt, bosit të lojërave të fatit, i zhdukur që prej gushtit 2022.
Forcat Operacionale bastisën në orët e para të mëngjesit dy vila në zonën e Fushë-Kuqes, e njohur si baza e Martinajt, dhe arrestuan dy persona me rrezikshmëri të lartë, Elvin Merlika, 47 vjeç, dhe Alket alias Fred Xhixha, 42 vjeç, bëri të ditur për “MCN Live” gazetari Besmir Pula.
Emrat e Merlikës dhe Xhixhës figurojnë në dosjen e “Plumbit të Artë”, pas dëshmisë së të penduarit Nuredin Dumani. Ata akuzohen për “Sigurimin e kushteve dhe mjeteve për të kryer vrasje, në bashkëpunim të posaçëm të grupit kriminal”, “Grup i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.
Sipas të dhënave, Merlika ka qenë pjesë e grupit që do të eliminonte Indrit Doklen, kreun e bandës së Durrësit. Porosia për vrasjen e Dokles dyshohet se ishte dhënë nga vetë Ervis Martinaj, i cili ishte gati të paguante për neutralizimin e tij.
Operacioni i koduar “Operacionalja 75” u finalizua nga Drejtoria e Forcës së Posaçme Operacionale. Dy të kërkuarit u kapën në terren të vështirë dhe ishin të armatosur me armë zjarri pistoleta dhe armë gjahu.
Gjatë kontrollit, forcat e posaçme sekuestruan si prova materiale: 2 armë zjarri tip pistoletë, 2 armë gjahu, municion luftarak, 2 radio të ngjashme me ato të policisë, një jelek antiplumb.
Operacioni u zhvillua në vijim të aksioneve të njëpasnjëshme të Policisë së Shtetit për kapjen e personave të shpallur në kërkim, bazuar edhe në informacione të siguruara në rrugë operative.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
