Autoritetet kolumbiane kanë shpallur gjendjen e fatkeqësisë publike pasi një zjarr masiv ka përfshirë malet rreth Villa de Leyva, një prej qyteteve koloniale dhe destinacioneve turistike më të njohura në verilindje të vendit.
Kushtet e thatësirës, të nxitura nga efekti i fenomenit El Niño, kanë ndezur të paktën 19 zjarre aktive në të gjithë Kolumbinë, duke shkatërruar sipërfaqe gjigante të bimësisë dhe duke detyruar evakuime masive.
Flakët që nisën të shtunën kanë gllabëruar rreth 290 hektarë tokë (ekuivalente me 400 fusha futbolli). Deri të dielën mbrëma, zjarri ishte rreth 50% nën kontroll. Erërat e forta po shtyjnë flakët drejt zonave të banuara. Janë evakuuar urgjentisht hotelet përreth dhe janë pezulluar mësimet fizike në shkolla.
Mbi 400 zjarrfikës, vullnetarë dhe katër helikopterë janë angazhuar në terren, duke hedhur rreth 240,000 litra ujë. Ministri i Mjedisit, Fabio Arjona, deklaroi se të dhënat e para sugjerojnë se zjarri në zonën turistike mund të jetë ndezur qëllimisht, ndërsa hetimet po vijojnë me intensitet.
Ndërkohë, Presidenti Abelardo De La Espriella konfirmoi përmes rrjetit social X se po monitorohen gjithsej 27 vatra në të gjithë vendin (19 aktive dhe 8 nën kontroll), ku situata më e rëndë paraqitet në rajonin malor të Tolimës.
Agjencia meteorologjike ka vënë 279 komuna nën alarm, prej të cilave 36 janë në alarmin maksimal të kuq. Vetëm në periudhën qershor-gusht, Kolumbia regjistroi 438 zjarre pyjore që shkrumbuan mbi 7,100 hektarë.
Ekspertët paralajmërojnë se periudha më kritike e tharjes së motit nga El Niño pritet të zgjasë nga tetori deri në prill, duke sjellë rrezik për mungesë të ujit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
