Presidenti rus Vladimir Putin tha se ai dhe udhëheqësi i Koresë së Veriut Kim Jong Un do të diskutojnë programin satelitor të Phenianit, ndër të tjera, teksa u takuan të mërkurën në Lindjen e Largët të Rusisë.
I pyetur nëse të dy udhëheqësit do të bisedonin për marrjen e furnizimeve nga Veriu për të rimbushur stokun e pakësuar të armëve dhe municioneve të Moskës, Putin tha se ata do të diskutonin "të gjitha çështjet".
Uashingtoni dhe aleatët e tij besojnë se bashkëpunimi në mbrojtje është një nga pikat kryesore të rendit të ditës për takimin.
"Më vjen mirë që ju shoh," tha Putin ndërsa i shtrëngoi dorën Kim-it për rreth 40 sekonda, duke e mirëpritur atë në Kozmodromin Vostochny, një strukturë moderne lëshimi në hapësirë në rajonin Amur të Lindjes së Largët të Rusisë.
"Ky është kozmodromi ynë i ri", tha ai. Kim falënderoi Putinin për ftesën dhe për ngrohtësinë e pritjes së tij.
Samiti mes liderëve të dy vendeve, të cilët janë bërë gjithnjë e më të izoluar ndërkombëtarisht, po vëzhgohet nga afër nga Uashingtoni dhe aleatët, të cilët dyshojnë se mund të bien dakord për tregtimin e armëve dhe teknologjisë së mbrojtjes.
Zyrtarët e SHBA dhe Koresë së Jugut kanë shprehur shqetësimin se Kim do t'i siguronte armë dhe municione Rusisë, e cila ka shpenzuar rezerva të mëdha në më shumë se 18 muaj luftë në Ukrainë.
Moska dhe Pheniani kanë mohuar synime të tilla.
Zgjedhja për t'u takuar në Kozmodromin Vostochny - një simbol i ambicieve të Rusisë si fuqi hapësinore - ishte e dukshme, pasi Koreja e Veriut dështoi dy herë të lëshonte satelitët e zbulimit në katër muajt e fundit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
