Adrian Shtuni, ekspert për çështjet e terrorizmit dhe sigurisë, thotë se agresioni ushtarak i Rusisë ndaj Ukrainës është rezultat i një monitorimi të kujdesshëm të zhvillimeve ndërkombëtare. Në mënyrë të veçantë, sipas Shtunit, Putin ka parë vulnerabilitet te BE-ja pas largimit të Britanisë nga Unioni dhe tërheqjes nga politika të kancelares Angela Merkel.
Putini e ka testuar botën edhe në Siri. Kjo tolerancë që ai ka konstatuar, me daljen e Britanisë nga BE, faktin që Merkel u largua nga politika e ka çuar të mendojë se mund ta dominojë Bashkimin Europian.
Shtuni vlerëson se kjo e vendos BE-në në një test të ri sa i përket unitetit dhe mundësisë së zgjerimit.
Është një test i jashtëzakonshëm për BE, i cili është ndërtuar për të parandaluar tragjedi si ato të Luftës së Parë dhe të Dytë Botërore. Kjo është një goditje në themelet e BE-së. Shpresojmë që BE ta ketë kuptuar mesazhin dhe në Ballkan ta mbyllë atë murin e juglindjes, i cili është i cenueshëm.
Reagimin europian pas sulmit rus, Shtuni e sheh si të vonuar.
Mendoj se reagimi ka qenë i vonuar, nga BE dhe vende të veçanta. Por ka një koalicion global që po i godet aspiratat hegjemoniste të Putinit. Ne kemi parë që rubla ka rënë me një të tretën e vlerës. Bursat kanë qenë të mbyllura prej tre ditësh. Pra ky mur i madh sanksionesh duket se po jep disa rezultate. Por kjo është edhe e rrezikshme. Sot një ministër francez foli për luftë financiare ndaj Rusisë, një mënyrë komunikimi që duhej të ishte shmangur. Situata është tejet e acaruar dhe mund të shkohet në një luftë shumë më e madhe sesa po shohim aktualisht.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
