Nuk ka fitues në “Niko Dovana”, Teuta dhe Tirana ndajnë pikët

Nuk ka prodhuar fitues, supersfida mes Teutës dhe Tiranës, e luajtur në “Niko Dovana” të Durrësit.

Ndeshja u mbyll me një barazim spektakolar 2-2, ku të dyja skuadrat i kishin rastet për fitore.

Tirana kaloi në avantazh me Florent Hasanin në minutën e 4-t, me sulmuesin që shënoi pas një gafe të mbrojtjes vendase.

Gjithsesi ky avantazh zgjati pak, pasi Teuta barazoi në minutën e 10-të me Realdo Filin nga penalltia.

10 minuta më vonë, erdhi edhe goli i përmbysjes për durrsakët, me Gjinollarin që shënoi me kokë.

Në minutën e 35-të u ndërpre ndeshja për disa minuta, pasi në stadium u fikën dritat, me ndriçimin që u rikthye në gjendjen e mëparshme pas 6 minutash pritje, që u zëvendësuan në fund të pjesës së parë.

Rastet nuk munguan as në pjesën e dytë, ku të dyja ekipet rrezikuan portat kundërshtare. Në minutën e 59-të, ishte Najdovski, që barazoi shifrat me një gol me kokë. Rezultati nuk ndryshoi deri në fund dhe dy skuadrat ndanë nga një pikë.

Me këtë barazim Tirana ngjitet në vendin e tretë me 4 pikë, ndërsa Teuta me një ndeshje me pak, mban vendin e gjashtë me 1 pikë.