Në Shqipëri këngëtar, në Itali kapo i drogës

Pesë shqiptarë janë mes të arrestuarve të një operacioni antidrogë që policia italiane ka kryer dje në disa zona të rajonit të Emilia Romagna-s.

Mediat italiane shkruajnë se grupi në fjalë ishte i shtrirë në zona të ndryshme të Emilia-s dhe Toscana-s.

Dëfrim Dervishi, Enver Dervishi, Haxhi Dervishi, Besnik Dervishi e Klodian Alushku janë 5 shqiptarët me 22 të arrestuarve në kuadër të këtij operacioni.

Grupi i shqiptarëve vepronte në zonat e Pisës dhe Firences, ku pasi furnizohej me kokainë nga Holanda, e shpërndante atë nëpërmjet një rrjeti shpërndarësish, mes të cilëve edhe një shqiptar tjetër, Olsi Izviku.

Hetimi ndaj këtij grupi nisi në mars të vitit 2016, kur familja e një të riu të varur nga droga denoncoi disa episode vandalizmi dhe zhvatjeje, të kryera nga grupi për shkak se i biri nuk u kishte shlyer paratë e kokainës.

Sipas hetimeve, në krye të organizatës kriminale qëndronte marokeni Jaormuni Mohamed, ndërsa shqiptarët vepronin si nëngrup, nën drejtimin e Dëfrim Dervishit, që në Shqipëri rezulton këngëtar me disa klipe në treg.

Marrëdhënia mes afrikanoveriorit dhe Dervishi ishte aq e afërt, saqë shpesh shqiptarët e jepnin kokainën me çmim të reduktuar.

Sasia e parave të përfituara nga ky aktivitet i paligjshëm dyshohet të jetë shumë e madhe.

Ata e blinin kokainën për 35 mijë euro për kilogram dhe e shisnin me doza 1-gramëshe me çmim 80-120 euro. Nga 1 kg kokainë e pastër nxirreshin rreth 4.5 kg lëndë e përzier, që më pas hidhej në treg. 

Gjatë operacionit, policia sekuestroi 7 kg kokainë dhe 28 mijë euro kesh.