Deputeti socialist Erion Braçe është paraqitur mëngjesin e sotëm në ambientet e GJKKO, ku po zhvillohet procesi gjyqësor ndaj tij në lidhje me padinë për shpifje të ngritur nga biznesmeni Anduel Çekrezi.
Procesi ndaj deputetit socialist po shqyrtohet në Gjykatën për Korrupsionin dhe Krimin e Organizuar për shkak të statusit të tij si deputet i Kuvendit të Shqipërisë.
Sipas deklaratave publike të bëra nga vetë Braçe, ai pretendon se është goditur fizikisht nga Çekrezi gjatë një momenti tensioni mes tyre, pas një debati që kishte lidhje me pronësinë e një sipërfaqeje toke në zonën e Lushnjës.
Deputeti socialist Erion Braçe ka denoncuar publikisht atë që ai e konsideron si grabitje të tokës publike pranë lumit Seman, me qëllim ndërtimin e një parku fotovoltaik në atë zonë.
Ndërkohë, kompania SunXpower ka siguruar lejen për ndërtimin e paneleve diellore në fshatin Imshtë të Lushnjës, zonë për të cilën Anduel Çekrezi pretendon se e ka blerë tokën përmes një kontrate noteriale nga ish-pronarë që, sipas tij, e kanë përfituar atë me vendim kthimi dhe kompensimi të vitit 1998.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
