Vritet nga policia një afro-amerikan në Kaliforni

Një 23-vjeçar afro-amerikan raportohet se është vrarë nga policia në San Bernardino, Kaliforni.

Një video tronditëse tregon një oficer që hap zjarr disa sekonda pasi doli nga makina në të cilën ndodhej.

Sipas policisë, dy efektivët ishin pjesë e një njësie të specializuar që po hetonte një lokal të paligjshëm të lojërave të fatit.

Afro-amerikani ia mbathi për pak minuta, por një nga agjentët e qelli dhe pak më vonë Robert Adams ndërroi jetë.

Familja e djalit të vrarë pranon se Adams punonte në vendin e paligjshëm të lojërave të fatit, por akuzon oficerët se ishin të paidentifikuar.  

Policia raporton se efektivët ishin me uniformë dhe për këtë arsye lehtësisht të dallueshëm dhe u përpoqën t'i jepnin urdhra djalit përpara se ai të fillonte të arratisej.