Parlamenti Evropian miraton 15 kushtet e Shqipërisë për integrimin (VIDEO)

Parlamenti Evropian miratoi në mbrëmjen e djeshme amendamentin e Grupit të Partive Popullore Evropiane, i cili përmbante 15 kushtet që duhet të përmbushë Shqipëria për t’u anëtarësuar në Bashkimin Europian.

Amendamenti u miratua me 388 vota pro, 280 kundër e 19 abstenim dhe u firmos nga eurodeputetja Kinga Gàl me kërkesën e reporterit për Shqipërinë, David Lega dhe me mbështetjen e koordinatorit Gahler.

Këto kushte u vendosën nga Këshilli Evropian me propozimin e Gjermanisë, Francës, Holandës, Danimarkës e Spanjës në mars të këtij viti.

Sipas raportimeve mësohet se pro amendamentit votuan Grupi Liberal dhe ai Konservator si dhe shumë deputetë nga e majta dhe djathta.

15 Kushtet 

 1. Miratimi i reformës zgjedhore;

2. Funksionimi i Gjykates Kushtetuese;

3. Funksionimi i Gjykatës së Lartë;

4. Finalizimi i ngritjes se strukturave kundër krimit të organizuar dhe anti-korrupsionit/Funksionimi i SPAK;

5. Forcimi i luftës kundër korrupsionit dhe krimit të organizuar, në bashkëpunim me vendet anëtare dhe nëpërmjet Plan Veprimit për adresimin e krimit financiar;

6. Ulje e numrit të azilkërkuesve;

7. Rishikimi i Ligjit të Medias në linjë me rekomandimet e Komisionit të Venecies;

8. Vazhdimi i Reformës në Drejtësi;

9. Track Records-Iniciimi dhe përfundimi i proceseve gjyqësore të shkallës së parë të zyrtarëve të lartë dhe politikanëve;

10. Progres në reformën e administratës publike;

11. Zbatimi i reformës zgjedhore;

12. Vendimi për ligjshmërinë e zgjedhjeve lokale 2019;

13. Miratimi i Akteve nënligjore të Ligjit për Pakicat Kombëtare;

14. Miratimi i Ligjit (të amenduar) të Censit;

15. Avancimi i procesit të regjistrimit të pronave.

Kryeministri Edi Rama në një prononcim kishte thënë më parë se 15 kushtet ndaj Shqipërisë nuk ekzistojnë, duke i mohuar ato.

Megjithatë, para Konferencës ndërqeveritare, hapi ky i radhës i Shqipërisë drejt BE-së, Parlamenti Evropian ka miratuar të 15 kushtet, duke sfiduar kështu klasën politike shqiptare.

Një gjë e tillë është e paprecedent për integrimin e një vendi në BE.