Gazetari Vudi Xhymshiti tha në edicionin e lajmeve në Mcn Tv se ftesa e SHBA-ve që Kosova t’i bashkohet Bordit të Paqes në Gaza është rikonfirmim i vazhdueshëm i Uashingtonit ndaj Kosovës, si garantor i ekzistencës së këtij shteti. I pyetur për reagimet e Ramës, Xhymshti tha se kryeministri i Shqipërisë “ka mizën pas veshit”, pasi sipas tij ai është katalizatori kryesor i kërcënimit të paqes që Trump-i garantoi mes Kosovës dhe Serbisë.
“Përballë politikave të jashtme dhe marrëdhënieve me jashtë të Republikës së Kosovës adresimi i duhej bërë Presidentes si shefja e shtetit. Presidentja është në një pozitë më të lartë se vet ministrja e Jashtme. Protokolli e do që t’i drejtohej Presidentes, prandaj ka ndodhur ashtu sic ka ndodhur. Është një vazhdimësi i marrëdhënieve mes SHBA-ve dhe Kosovës dhe një rikonfirmim i vazhdueshëm i SHBA-ve ndaj Kosovës, si garantor i ekzistencës së shtetit, sigurisë dhe paqes në rajon.
Rama po reagon pasi ka mizën pas veshit. Është katalizatori kryesor në rajonin e Ballkanit Perëndimor, që me politikat e tij agresive kundër Kosovës dhe favorizuese për Beogradin zyrtar, të bashkërenduar me Moskën, ka qenë mbështetës i këtyre politikave kundër interesave të Kosovës. Rama ka qenë katalizatori kryesor i kërcënimit të paqes që Presidenti Trump ka arritur ta garantojë mes Kosovës dhe Serbisë, duke i thënë qartë Serbisë që s’mund ta sulmosh Kosovën.
Deklaratat e Ramës prej fasade, janë vazhdimisht kontraverse, herë ashtu e herë kështu, varet siç i konvenon atij. Kemi një kryeministër jo stabil, që bashkëqeveris me krimin e organizuar, një kryeministër që veprimet e tij politike janë në kundërshtim me sigurinë kombëtare të Shqipërisë dhe Kosovës, siç ishte emërimi i Vlora Hysenit, që ishte shkarkuar nga Kosova me dyshimet për tregtimin e sekreteve shtetërore të Kosovës me shtetin armik të Serbisë. Rama e emëroi si drejtoreshë të SHISH. Vizita e saj e parë zyrtare ishte në Beograd!”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
