Del në ankand jahti 81 mln dollarë në pronësi të oligarkut rus

Një superjaht prej 81 milionë dollarësh që thuhet se është në pronësi të oligarkut të sanksionuar rus Andrey Guryev do të nxirret në ankand nga qeveria e Antigua dhe Barbuda, e cila pretendon se anija është braktisur në Karaibe që nga pushtimi rus i Ukrainës vitin e kaluar.

Qeveria e Antigua dhe Barbuda të hënën paralajmëroi pronarin e superjahtit Alfa Nero se kishin 10 ditë për të kërkuar anijen ose do t'i shitej ofertuesit më të lartë.

Ministri i informacionit, Melford Nicholas, tha se Alfa Nero ishte braktisur në portin Falmouth në Antigua që nga shkurti i vitit 2022 dhe qeveria "po përpiqej të parandalonte një rrezik të ardhshëm pasi anija luksoze nuk po mirëmbahet nga pronari i saj".

Në një deklaratë zyra e kryeministrit të Antigua dhe Barbuda tha: “Një njoftim për gazetat dhe mediat e tjera do të publikohet për një periudhë 10-ditore, duke njoftuar shitjen e anijes Alfa Nero në mënyrë që të plotësohen kërkesat sipas ligji për shitje të detyruar. Nëse pronari nuk arrin të pretendojë anijen brenda asaj periudhe kohore, qeveria e Antigua dhe Barbuda do t'ia shesë atë ofertuesit më të lartë”.

Guryev, 62 vjeç, i cili bëri një pasuri prej 10 miliardë dollarësh nga kompania ruse e plehrave PhosAgro, është pronari i Alfa Nero sipas qeverisë amerikane, e cila vendosi sanksione ndaj tij vitin e kaluar.

Zyra e Thesarit të SHBA-së për Kontrollin e Pasurive të Huaja (OFAC) tha se kishte “identifikuar Alfa Nero, një jaht me flamur në ishujt Kajman që AG Guryev thuhet se e bleu për 120 milionë dollarë në 2014, si pronë e bllokuar e AG Guryev”.

Jahti, i cili përmban një pishinë 12 metra, një xhakuzi, një spa, një dhomë bukurie dhe një helipad, është përdorur nga familja e Guryev, duke përfshirë djalin e tij (gjithashtu Andrein) dhe gruan e djalit të tij, Valeria, e cila studionte në Kolegjin e Modës në Londër.