Gazi rus, BE përgatit planin e emergjencës për racionim

Komisioni Europian po përgatit një plan emergjence gazi që do të nisë në rast se Rusia ndërpret furnizimet në BE, siç ka bërë tashmë me Poloninë dhe Bullgarinë.

Plani, i raportuar sot nga gazeta spanjolle El Paìs, do të prezantohet më 18 maj dhe parashikon masa emergjente që do të prekin të gjitha vendet anëtare të BE-së: ato që kanë burime të tjera furnizimi, si Spanja, e cila ka një kapacitet të mirë për rigazinifikimin, do të duhet të ndajnë gazin e tyre me vendet e prekura nga shkurtimet e bëra nga Rusia.

Komisioni do të kërkojë gjithashtu që racionimi i furnizimit me gaz, i cili do të niste nga sektori industrial, të zbatohet në mënyrë të tillë që kompanitë në një vend që nuk vuan nga problemet e furnizimit të mos kenë avantazhe konkurruese ndaj atyre që operojnë në më shumë shtete anëtare të goditura nga Moska.

Për të shmangur racionimin e energjisë, disa vende anëtare kanë miratuar masa për të kufizuar konsumin, duke filluar nga inkurajimi i transportit publik deri te ulja e temperaturave në ndërtesa, shërbime publike dhe pishina.

Sipas El Paìs, Komisioni Europian, po përgatitet të përdorë rregulloren e vitit 2017 për sigurinë e furnizimeve, për të vendosur masa që garantojnë ardhjen e gazit për përdoruesit e mbrojtur, familjet dhe shërbimet thelbësore sociale, në të gjitha vendet dhe që zbutin pasojat ekonomike dhe sociale të një emergjencë e mundshme, e cila do të shkaktohej nga një ndalim i papritur i furnizimit me gaz nga Rusia.

Sipas rregullores së vitit 2017, çdo vend i prekur mund të shpallë një emergjencë në nivel kombëtar, por mund të përdorë edhe klauzolën e solidaritetit, e cila do të detyronte vendet fqinje ta ndihmojnë. Komisioni është përgjegjës për shpalljen e një emergjence rajonale ose në mbarë Bashkimin Europian, nëse kriza e furnizimit do të përhapet.

Sipas burimeve europiane të cituara nga El Paìs, nëse ndërprerja e gazit rus do të ishte e plotë, atëherë masat e kontrollit të parashikuara nga rregullorja duhet të zbatohen në të gjitha vendet anëtare të BE-së.

Në këtë rast, Komisioni do të kontrollojë nëse klauzola e solidaritetit zbatohet drejt nga të gjithë. Masat e para parashikohen vullnetare, me synim uljen e konsumit në sektorin industrial. Por, në rast emergjence, shtetet do të duhet të vendosin racionimin ose pezullimin e furnizimeve, si për të mbuluar kërkesën e klientëve të tyre thelbësorë familjet dhe shërbimet thelbësore sociale dhe për të ndihmuar vendet fqinje të mbulojnë kërkesën e të njëjtit grup përdoruesish.