Mësuesja Merita Demiri ka denoncuar në emisionin ‘’Xhadat’’ emërimin në shkelje të ligjit të mësuese Ertygela Fishtës, në shkollën 9- vjeçare ‘’Shefqet Tançi’’ në Bulqizë. Ajo akuzon drejtorin e Zyrës Vendore Arsimore Bulqizë, zotin Fatos Muha dhe drejtorin e shkollës 9 -vjeçare ‘’Shefqet Tançi’’ se kanë favorizuar emërimin e koleges së saj.
Merita Demiri donte të konkurronte për atë vend pune, por vendi vakant nuk u shpall kurrë dhe kjo sipas saj u bë qëllimisht, pasi emërimi i mësueses tjetër ishte paracaktuar.
Denoncuesja më herët i ishte drejtuar edhe Ministrisë së Arsimit për këtë problem, dhe në përgjigje thuhej se emërimi i Ertygela Fishtës si mësuese në shkollën ‘’Shefqet Tançi’’ nuk ishte bërë në përputhje me ligjin. Edhe pas konstatimit të shkeljes nga Ministria, nuk ishte marrë
asnjë masë. Shkelësit e ligjit dhe mësuesja vazhdonin qetësisht punën. Kjo deri në momentin kur në derë ju trokitën “ Xhadat”.
Drejtori i ZVA Bulqizë Fatos Muha nuk dha përgjigje konkrete nëse është shpallur vakant apo jo ky pozicion pune. Edhe pse gazetari i “Xhadave” këmbënguli për përgjigje, ai doli nga institucioni duke shëtitur nëpër qytet teksa gazetari e pyeste, dhe kërkonte pareshtur kërkesë me shkrim për dhënie informacioni.
Mësuese Ertygela Fishta u përpoq gjithashtu të mos jepte asnjë sqarim se si e kishte përfituar atë vend pune. Cila ishte procedura të cilës i ishte nënshtruar përpara emërimit. Në ballafaqimin mes dy mësueseve, denoncuesja e akuzoi mësuese Ertygelën se vendin e punës e kishte dhuratë nga burri i saj i cili ishte angazhuar në fushatën e fundit zgjedhore në Bulqizë. Argumenti i vetëm që mësuesja kishte për emërimin në atë vend pune, ishte se kishte tre fëmijë të vegjël.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
