Fleckenstein, vizitë surprizë në Tiranë. Takimi i parë, me Metën

Raportuesi për Shqipërinë në Parlamentin Europian, Knut Fleckenstein, ka mbërritur në një vizitë surprizë në Tiranë.

I shoqëruar dhe nga ambasadorja e BE-së në Tiranë, Romana Vlahutin, ai zhvilloi një takim në Presidencë me Kreun e Shtetit Ilir Meta, takimi i parë ky mes tyre që kur Meta mori detyrën e Presidencës.

Sipas zyrës së shtypit të Presidencës, gjatë takimit me Fleckenstein, Meta ka vënë theksin tek avancimi i reformave për integrimin përmes një konsensusi sa më të gjerë pozitë-opozitë.

“Avancimi i reformave gjithpërfshirëse dhe me konsensus sa më të gjerë mes pozitës dhe opozitës, me qëllim integrimin e Shqipërisë në Bashkimin Europian dhe mundësimi i një klime politike mirëbesimi dhe bashkëveprimi të ngushtë është shumë i rëndësishëm në këtë proces” është shprehur Presidenti Meta.

Presidenti i Republikës  nënvizoi se një rëndësi madhore ka zbatimi i Reformës në Drejtësi, në veçanti ecuria e procesit të Vettingut, me synim krijimin sa më të shpejtë të institucioneve të reja të drejtësisë.

Pas takimit në Presidencë, eurodeputeti i është drejtuar Kuvendit për një takim me kryeparlamentarin e ri Gramoz Ruçi.