Dy persona janë arrestuar nga Policia e Shkodrës në fshatin Ura e Shtrenjtë, pas kontrolleve të ushtruara në një banesë, ku u gjetën dhe u sekuestruan 11 armë zjarri, 5506 fishekë luftarakë, 7 krehra armësh zjarri automatik, 6 krehra armësh pushkë, 35 metra fitil detonator, 25.2 kg kanabis dhe 2 palë targa të huaja.
Korrespondentja Bendis Druni bën të ditur për “MCN Live” se operacioni u realizua pas hetimeve intensive, ndërsa dy personat që janë arrestuar dyshohet se janë posedues të sendeve dhe materialeve të sekuestruara.
Strukturat e DVP Shkodër kanë finalizuar operacionin e koduar “Ndërmollasi 2”, në fshatin Ura e Shtrenjtë, ku janë sekuestruar arsenal armësh zjarri dhe municioni luftarak; rreth 25.2 kg Cannabis Sativa dhe 2 palë targa të huaja.
Banesa i përket 29-vjeçarit R. M., i cili u arrestua më 14 shtator 2025. Në pranga kanë rënë gjithashtu Sami Meaj dhe Selim Myrtja, të dy banues në fshatin Ura e Shtrenjtë, pasi nga hetimet e para dyshohet se ata janë posedues të sendeve dhe materialeve të sekuestruara dhe gjithashtu bashkëpunëtorë të R. M.
Më këtë rast janë sekuestruar në cilësinë e provës materiale:
-11 armë zjarri, 5506 fishekë luftarak, 7 krehra arme zjarri automatik, 6 krehra armë zjarri pushkë, 35 metra fitil detonator;
-25.2 kg lëndë e dyshuar narkotike Cannabis Sativa;
-2 palë targa të huaja, njëra e shtetit të Gjermanisë, tjetra e shtetit të Austrisë.
Policia ka publikuar edhe pamjet e operacionit të filmuara me dron. Nga video shihet momenti kur forcat e rendit mësynë në banesë, duke zbuluar vendet ku ishin të fshehura armët dhe kanabisi.
Në drejtimin e Prokurorisë, vijojnë hetimet për dokumentimin e plotë të kësaj veprimtarie kriminale dhe identifikimin e shtetasve të tjerë që mund të jenë të përfshirë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
