Ish-kryeparlamentari i Kosovës, Jakup Krasniqi, doli sot para trupit gjykues në Dhomat e Specializuara në Hagë. Krasniqi, i cili ka luajtur rolin e zëdhënësit të UÇK-së gjatë luftës, u njoh me akuzat.
Atakuza e ngarkon Krasniqin me akuza për krime lufte dhe krime kundër njerëzimit sipas të drejtës ndërkombëtare, për forma të ndryshme të përgjegjësisë penale.
Krasniqi e cilësoi procesin një maskaradë dhe theksoi se padrejtësitë kanë rënduar mbi popullin e Kosovës.
“Unë dhe populli im kemi mbajtur shumë padrejtësi. Në seancat e tjera do të them më shumë, por nuk do ta ndieja veten mirë të isha në shërbim të politikave gjenocidale të Serbisë. Adresa e qartë e gjithë kësaj maskarade është në Beograd”, tha ai.
Krasniqi u vetëdeklarua i pafajshëm për të gjitha pikat e aktakuzës. Ai tha se ka luftuar politikisht kundër Serbisë dhe kurrë kundër popullsisë së saj në asnjë formë.
“Jam njeri që e kam luftuar politikisht Serbinë dhe s'e kam drejtuar gishtin nga popullsia serbe, në aktakuzë i ndani shqiptarët katolikë dhe mysmiman, unë jam shqiptar dhe për mua është fyese. Cilësimi i Prokurorit se jemi ndërrmarje kriminale e përbashkët, për mua, shokët, familjet që luftuam gjatë për kombin tonë nuk ka gjë me fyese sepse ne në një kohë të gjatë, në rrethana të vështira jetë a vdekje u vumë në shërbim të lirisë, që e arritëm me SHBA e BE, me NATO e OKB dhe të gjithë ishim dhe jemi ndërrmarje e përbashkët çlirimitare dhe shtetformuese, ndërsa kriminal janë jo vetëm serb në Serbi, ka qenë vetëm koka e saj në Beograd dhe mbështetësit e politikave të Beogradit”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
