*Ky është rrëfimi i fotoreporterit Ting Shen, gjatë protestës pro-Trump që sulmuan Kapitol. Nga ngjarja humbën jetën 4 persona.
20 minuta para se ta xhiroja atë video (e gjeni më poshtë), isha në korridorin e ndërtesës së Kapitolit të SHBA-ve dhe një koleg më çoi mesazh se Ndërtesa e Zyrës së Cannon House po evakuohej për shkak të një pakoje të dyshimtë. Ishte menjëherë pasi votimet elektorale të Arizonës filluan të kontestoheshin, dhe unë isha i zënë me regjistrimin e imazheve të senatorëve që ecnin në dhomën e Senatit. Kështu që pasi mbarova regjistrimin, fillova të lëvizja, duke kërkuar fotografë të tjerë për të parë se çfarë po ndodhte dhe për të realizuar edhe fotografitë e mia. Si fotografë, është detyra jonë të dokumentojmë atë që po ndodh.
Në një ditë normale, ne duhet të kalojmë nëpër nivele të shumta sigurie. Disa nga vendet ku po vinin protestuesit, janë zakonisht të bllokuar. Këto janë vende jashtë kufijve për njerëzit normalë. Edhe me një distinktiv kongresi, nuk mund të shkosh atje. Pashë qytetarë të thjeshtë duke hyrë në ndërtesë.
Ne po përpiqeshim të shihnim se çfarë po ndodhte jashtë, por nuk kishte shumë dritare. Pashë një oficer policie që nxirrte sprajin djegës për të ndaluar protestuesit, por ishte vetëm, kështu që iu desh të hiqte dorë. Në shkallët e Kapitolit, në nivelin e parë në anën e Shtëpisë, pamë protestues që filluan të thyenin dritaret, dyert dhe nuk kishte shumë policë. Duke e parë, ishte e frikshme. Ky ishte momenti kur mendova "Oh, dreqi e mori".
Ne e dinim se duhej të ndiqnim urdhrin ‘strehim në vendngjarje’ dhe të ktheheshim në Galerinë e Fotografëve të Shtypit të Senatit. Kishte më shumë fotografë atje, por më pas ata dëgjuan për më shumë gjëra që po ndodhnin poshtë, kështu që një grup doli me vrap. Po përpiqesha të dërgoja disa imazhe që sapo kisha kapur nga njerëzit që hynin në ndërtesë.
Ne fotografët kemi këtë lloj protokolli: Asnjëherë nuk qëndrojmë vetëm në këtë lloj situatash, kështu që unë shkova së bashku me një fotograf tjetër, dhe arritëm menjëherë jashtë Dhomës së Shtëpisë - mendoj që para se ata ta sulmonin, por nuk jam i sigurt 10 ose 15 sekonda më vonë, policia e Kapitolit na tha që thjesht të largoheshim, të evakuoheshim.
Më pas na thanë të ktheheshim në zyrat tona brenda Kapitolit, por kjo është në anën e Senatit dhe ne ishim në anën e Shtëpisë, e cila është rreth 5 minuta me këmbë. Kështu që ndërsa po shkonim atje, u morëm nga disa punonjës të Senatit dhe përfunduam të evakuoheshim në një bodrum që disi na çoi në anën e Senatit. (Këto janë rrugë dhe tunele që nuk i shkelim.) Hapëm derën në anën e Senatit dhe pamë që Qendra e Vizitorëve të Kapitolit gjithashtu ishte e mbushur me protestues.
Kështu që ata e bllokuan atë derë. Dhe më pas u evakuuam së bashku me senatorët në një vendndodhje të pazbuluar aty afër, ku jemi akoma tani [fotoreporteri tregoi ngjarjen në orën 16:15 me orën lokale]. Nuk kishte shumë njerëz sepse është një staf i strukturuar në Capitol për shkak të COVID-19. Të gjithë ishin të qetë; askush nuk dukej i frikësuar. Policia që na shoqëronte po largohej sepse ishin ata që merreshin me të.
Nuk bëra fotografi gjatë evakuimit sepse është një situatë emergjente dhe jemi gjithashtu me të gjithë senatorët, kështu që thjesht nuk është mirë të bësh foto gjatë diçkaje të tillë. Por deri në ato momente, të gjithë ende po bënim fotografi; ende kishim një punë për të bërë. Por në të njëjtën kohë, gjithashtu po përpiqeshim të menaxhonim sigurinë tonë dhe të kujdeseshim për njerëz të tjerë, fotografë të tjerë.
E keni parasysh, në fakt u thirra për të mbuluar tubimin e sotëm pro-Trump nga një media dhe thashë jo. Unë personalisht kam bërë një politikë që nuk do të mbuloj asnjë tubim të jashtëm si ky, veçanërisht gjatë pandemisë. Nëse do të më pyesnit dy vjet më parë, nuk do të mendohesha dy herë. Por tani, thjesht nuk ia vlen. Unë jam një person me ngjyrë. Jam një profesionist i pavarur. Nëse lëndohem apo plagosem, askush nuk do të mbulojë shpenzimet e mia. Nuk kam mbështetje. Nuk kam asgjë nga ato, kështu që unë them jo. Jam në detyrë sërish nesër, por nuk e di për shkak të kësaj situate, se si do të ndryshojë gjithçka./ Përkthyer nga Cosmopolitan
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
