Ushqyerja e shëndetshme dhe një stil jetese aktiv janë dy shtyllat kryesore për ruajtjen e shëndetit dhe arritjen e peshës ideale.
Në një intervistë për emisionin “Zgjohu me MCN”, nutricionisti Pavli Brozi foli për rëndësinë e mënyrës së të ushqyerit dhe ndikimin e saj në peshën trupore.
Ai theksoi se një nga gabimet më të zakonshme që bëjnë njerëzit është konsumimi i tepërt i ushqimeve të pasura me sheqer.
Sipas tij, më e rëndësishme se numërimi i kalorive është rregullimi i hormoneve.
Trupi funksionon mbi bazën e hormoneve si insulina, hormoni i ngopjes, estrogjeni dhe testosteroni. Edhe nëse jemi në deficit kalorik, mund të mos dobësohemi nëse hormonet nuk janë në ekuilibër.
Insulina, e cila prodhohet nga pankreasi, luan një rol kyç në shtimin në peshë dhe në zhvillimin e diabetit.
Konsumi i shpeshtë i ushqimeve me sheqer të lartë mund të çojë në rezistencë ndaj insulinës, duke bërë që trupi të ruajë më shumë yndyrë dhe ta ketë më të vështirë humbjen e peshës.
Sa herë konsumojmë ushqim, rritet niveli i insulinës, por problemi kryesor janë ushqimet e përpunuara dhe sheqernat e shtuara, të cilat e rrisin atë ndjeshëm.
Rekomandohet që vaktet të nisin me ushqime të pasura me fibra dhe proteina, si sallatat, pasi ato ndihmojnë në stabilizimin e nivelit të sheqerit në gjak.
Unë sugjeroj që mëngjesi të përfshijë ushqime si fruta të thata (bajame, arra), vezë dhe avokado, të cilat ndihmojnë në krijimin e ndjenjës së ngopjes dhe në kontrollin e glicemisë.
Brozi këshillon eliminimin e ushqimeve të përpunuara dhe të sheqerit të shtuar, si dhe konsumimin e 2-3 vakteve të balancuara në ditë, pa u fokusuar te numërimi i kalorive, por te cilësia e ushqimit dhe balanca hormonale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
