TIA reagon mbi një vendim të Gjykatës së Krujës

Aeroporti Ndërkombëtar i Tiranës (TIA) ka reaguar kundrejt një vendimi të Gjykatës së Rrethit Krujë i cili ka rezultuar në bllokimin e disa aktiviteteve tregtare në TIA. Vendimi është marrë nga një gjykatëse e vetme, Zj. Enkeleida Hoxha me 4 masa sigurie, në favor të A&A Group, për operimin e kafeve dhe dyqaneve në aeroport. TIA shpreh shqetësimin për një sistem të njëanshëm të drejtësisë, ku vendimet - jashtë juridiksonit dhe pa asnjë profesionalizëm - kanë dëmtuar ringritjen e dyqaneve dhe bareve të reja në shërbim të pasagjerëve, në dëm të shërbimit publik dhe të imazhit kombëtar të aeroportit.

Eshtë rast unikal në botë, ku vendimi i Zyrës Përmbaruese i dorëzohet TIA-s përpara vendimit të gjykatës, pa asnjë njoftim paraprak për TIA-n, duke nënkuptuar shpejtësinë e pazakontë dhe kapërcimin e procedurave që në një proces të rregullt dhe ligjor mund të marrin disa ditë.

Duket qartë që TIA ka ndërruar qëndrimin e saj mbi kontratat në aeroport pasi tashmë shpreh keqardhjen për këtë situatë të pashembullt që ndodh një aeroportin e vetëm ndërkombëtar, ku interesat e një grupi të veçantë, më saktë të Administratorit të A&A Group, Zj. Aliona Zeqiri, shihen si objekti i vetëm për diskutim ligjor, ndërkohë që paligjshmëria zbatohet për TIA-n në çdo masë sigurie.

TIA ka përcjellë ankesën e saj në Inspektoriatin e Lartë të Drejtësisë kundrejt Zj. Enkeleida Hoxha.
Tirana International Airport Shpk thekson se bazuar në Ligjin Nr.9312 datë 11.11.2004 “Për Ratifikimin e Marrëveshjes së Konçesionit ndërmjet Këshillit të Ministrave të Republikës së Shqipërisë dhe Shoqërisë Konçesionare, “TIA ka të drejtë ekskluzive të zhvillimit tregtar të aeroportit” dhe përzgjedhja e fituesve të tenderit për baret, restorantet dhe dyqanet, është në të drejtën e zgjedhjes së lirë të TIA-s.

TIA ka vënë në dukje se klima e biznesit ka marrë goditje të rëndë.