Në prag të vizitave të Presidentit të SHBA-ve, Donald Trump, protestues nga e gjithë Mbretëria e Bashkuar kanë nisur të organizohen.
Kryeministri britanik, Sir Keir Starmer, e ka cilësuar si një nder faktin që Trump do të pritet për herë të dytë në një vizitë shtetërore në shtator, ku do të mikpritet nga Mbreti Charles III dhe Mbretëresha Camilla në Kalanë e Windsorit.
Megjithatë, Trump do të udhëtojë në Britani më herët, pasi ai do të vizitojë Skocinë nga data 25 deri më 29 korrik.
Gjatë kësaj periudhe, ai pritet të zhvillojë takime private me kryeministrin Starmer dhe Kryeministrin e Skocisë, John Swinney.
Zëdhënësja e Shtëpisë së Bardhë, Karoline Leavitt, ka konfirmuar se Trump do të vizitojë Turnberry në Skoci, ku është pronar i një hoteli dhe fushe golfi.
Vizita do të përfshijë edhe ndalesa në qytetin Aberdeen, pranë kompleksit tjetër të tij, Trump International Golf Links. Presidenti ka lidhje familjare me Skocinë, pasi nëna e tij, Mary Anne MacLeod, ka lindur dhe është rritur në ishullin Leëis.
Megjithëse Trump ka shprehur entuziazëm për vizitën shtetërore në veçanti, protestat ndaj tij tashmë kanë nisur në Britani.
Një fotografi e Donald Trump me Jeffrey Epstein është vendosur në një stacion autobusi pranë ambasadës amerikane në Londër.
Grupi “Everyone Hates Elon” publikoi një video të momentit të vendosjes së fotos, duke shkruar: “Do të ishte një fatkeqësi për Donaldin nëse kjo foto e tij me Epstein do të shfaqej kudo gjatë vizitës në Britani. Do të ishte me të vërtetë për të ardhur keq nëse të gjithë do të dhuronin për ta bërë këtë realitet.”
Gazeta Wall Street Journal publikoi më 17 korrik një artikull, ku pretendohej se Trump i kishte shkruar Epstein-it një letër 'të pahijshme' për ditëlindjen në vitin 2003, duke përfshirë një vizatim të një gruaje të zhveshur.
Trump ka mohuar të ketë shkruar mesazhin dhe ka nisur veprime ligjore ndaj gazetës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
