Takoi Osmanin dhe Kurtin, Lajçak: Ka mirëkuptim për 3 pikat e paraqitura nga BE-ja

I dërguari i Bashkimit Evropian për dialogun Kosovë – Serbi, Miroslav Lajçak, ka thënë pas takimit me kryeministrin Albin Kurti se palët kanë rënë dakord që të vazhdojnë diskutimet për shtensionim të situatës në veri. Në deklaratën e tij për mediat Lajçak tha se ka mirëkuptim nga liderët e Kosovës që të ecet përpara në tri pikat e kërkuara nga BE-ja: shtensionim, zgjedhje të reja dhe kthim në normalizim. “Nuk është detyrë e lehtë, as situatë e lehtë. Kam pasur takime të rëndësishme me presidenten Osmani e kryeministrin Kurti. Diskutim të gjatë e sinqertë. Shumë të rëndësishëm. Duhet të zgjedh fjalët, ka mirëkuptim në nevojën për të ecur para në tri pikat që janë paraqitur nga BE-ja: shtensionim, zgjedhje të reja, dhe kthim në normalizim. Ende duhet të vazhdojmë diskutimet për hapat konkretë që duhet të merren. Ai [Kurti] ka prezantuar pikëpamjet e tij, unë të miat”. Ndërkohë në një deklaratë nga Kryeministria bëhet me dije se Kurti i ka shprehur Lajçak se masat ndëshkuese të BE-së ndaj Kosovës janë të padrejta dhe e bëjnë dialogun asimetrik, megjithatë ka theksuar përkushtimin dhe angazhimin e tij për shtensionim dhe normalizim të situatës në veri.