Edi Rama dhe Lulzim Basha pritet të takohen në fillim të javës që vjen për të arritur një marrëveshje për reformën në drejtësi por edhe më gjërë. Dy liderët, përfaqësuesit e dy partive më të mëdha politike në Shqipëri, PS në mazhorancë dhe PD në opozitë, nuk janë takuar asnjëherë gjatë tre viteve të fundit, qysh kur Edi Rama formoi kabinetin e ri qeveritar pas zgjedhjeve.
Do të duhej të kishte qenë detyrim ligjor e moral për krerët e partive më të mëdha në vend që të gjenin komunikimin e vazhdueshëm institucional për të bashkëpunuar në të mirë të qeverisjes së vendit, secili në pozitën e vet. Por, ka ndodhur e kundërta. Secili në qëndrimin e tij kokëfortë, pa dhënë asnjë sinjal bashkëpunimi, e në betejën e përhershme të një lufte pa fitues, kanë prodhuar kriza të vazhdueshme, të cilat janë vetëm në dëm të qytetarëve.
Çfarë mund të pritet në këto kushte nga një takim i mundshëm Rama -Basha?
E tillë ka qënë historia e politikës shqiptare. Gazetarja e TemA TV, Luljeta Progni me anë të kësaj speciale rikthen takimet më të bujshme të dy dekadave të fundit ku sipas saj ka vetëm një bilanc: Dështimi i qëllimshëm i konsensusit dhe sa më shumë ushqim për konfliktin. Duke nisur nga takimi Majko - Berisha i vitit 1998 dhe duke u ndalur në pritshmëritë për ditët në vazhdim, kjo speciale hedh dritë mbi traditën e vërtetë të konsensusit politik në vendin tonë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
