Qori: Protesta për Zvërnecin i ngjan atyre kundër armëve kimike dhe protestës studentore, por dallon për kërkesat e saj politike

Shoqëria civile dhe qytetarë të shumtë kanë marshuar për të pestën ditë radhazi në Tiranë kundër projektit të investimit në Zvërnec.

I ftuar në emisionin “Të Paekspozuarit”, kreu i Lëvizjes Bashkë, Arlind Qori, e krahasoi këtë mobilizim me protestat e mëdha qytetare të viteve të kaluara, si ato kundër importit të armëve kimike dhe lëvizja studentore, por theksoi se protesta aktuale ka një karakter më të theksuar politik.

 

Po të them se kjo protestë ka të përbashkëta me të armëve kimike dhe të studentëve, por ka bërë një hop cilësor përpara, është dukshëm më e madhe. E them si pjesëmarrës në vetë të parë. 

 

Ka diçka që e veçon këtë protestë dhe besoj se është më vështirë të bësh debat, janë kërkesat, qëndrimet. 

Është hera e parë që ka një protestë masive qytetare dhe kërkesat janë politike. 

 

Kryekërkesa këtu është dorëheqja e Edi Ramës. Kërkohet në masë. A ka kërkesë më politike?

 

Kërkesa dhe fryma janë politike, rrënjësore, prekin të gjithë dimensionet e jetës. Kërkohet dorëheqje e Ramës, kërkohet burg për Ramën dhe Berishën.

 

 Nuk është thirrur kurrë kjo. Protestuesit i kundërvihen oligarkisë ekonomike. Madje protestuesit thonë bojkotoni mediat, janë thirrje nga mijëra vetë. 

 

Nëse protestuesit thërrasin bojkotoni mediat, e thonë sepse për ditë të tëra televizionet kryesore kanë heshtur. 

Më shumë kanë informuar mediat e huaja, sesa televizionet kryesore në Shqipëri, që kanë bërë teori konsipracioni.

 

Protesta për Zvërnecin po shndërrohet në një lëvizje më të gjerë qytetare, që artikulon jo vetëm shqetësime mjedisore, por edhe kërkesa për ndryshime politike dhe institucionale.