Qazim Gjoni një qytetar nga Fushë -Kruja denoncoi në emisionin Xhadat, institucionin financiar jobankar Micro Credit Albanian dhe përmbaruesin Fatos Alimadhi, të cilët sipas tij e kanë shpallur debitor për një kredi të shlyer 15 vjet më parë.
I moshuari paraqiti publikisht të gjitha dokumentat që vërtetonin se kredia ishte shlyer, ku bënte pjesë një vërtetim i lëshuar nga vetë institucioni financiar që kishte dhënë kredinë si dhe një kontratë noteriale që palët kishin bërë për mbylljen e detyrimeve përpara noterit.
Me shkresën e fundit drejtuar qytetarit, përmbaruesi Fatos Alimadhi ka urdhëruar vendosjen e sekuestros konservative për tokë arë dhe truall, mbi të cilin denoncuesi ka ndërtuar banesën e tij. Ai ka kërkuar gjithashtu dhe pasqyrimin e këtij veprimi në regjistrin publik dhe në kartelën e pasurisë së paluajtshme në pronësi të tij.
Xhadat u përpoqën të kontaktojnë me përmbaruesin.
Pas përpjekjeve për disa ditë me radhë, ky i fundit kërkoi një shkesë zyrtare, për të dhënë një informacion mbi rastin.
Bashkë me denoncuesin Xhadat kërkuan zyrën e Micro Credit Albania, zyrë të cilës çuditërisht i mungonte edhe tabela me informacionin mbi aktivitetin që kryente.
Nga ana e punonjëses u pranua se përmbaruesi Fatos Alimadhi ekzekutonte kërkesat e tyre për shlyerjen e debive.
Sipas saj Micro Credit Albania ka blerë creditë e NOA.
Nisur nga kjo, denoncuesi realizoi dhe një takim me një nga përfaqësuesit e NOA, ku iu premtua se çështja do të verifikohej.
Në lidhje me veprimet e përmbaruesit Fatos Alimadhi, denoncuesi bëri dhe një ankesë pranë Dhomës Kombëtare të Përfaqësuesve Gjyqësor Privat.
Përmes emisionit Xhadat ai i bëri thirrje ministrit të Drejtësisë të kontrollojë aktivitetin e përmbaruesve privat, që sipas tij po shkelin ligjin.
“I lutem gjithë pensionistëve dhe çdo njeriu që t`i mbaj dokumentat. Po mos t`i kisha pas këto dokumenta ju nuk do të kishit ardhur pas meje dhe mua do më kishte ikur prona”. - u shpreh ai.
Emisioni Xhadat do të ndjek në vazhdim rastin, duke qëndruar në pritje të verifikimit të ketij rasti nga institucionet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
