Operacioni i zhvilluar ditën e djeshme ku ranë në pranga dy punonjës të IMT-së, Gerald Fuçia dhe Edmond Çela si dhe u shpallën në kërkim dy të tjerë ka qenë i simuluar.
Mësohet se katër punonjës të IMT-së kanë konstatuar një tendë brenda oborrit të një banesë në Kombinat, që më pas rezultoi që ishte lokal.
Punonjësit e IMT-së i kanë kërkuar pronarit të lokalit të heqë tendën. Njëri prej punonjësve është kthyer sërish brenda banesës pas pak minutash dhe i ka kërkuar pronarit 1000€ në këmbim që të mos i hiqte tendën e lokalit në Kombinat. Pronari i objektit kallëzoi në polici ngjarjen, duke thënë se i kanë kërkuar ryshfet për të mos hequr tendën.
Policia e referoi çështjen në prokurori dhe më pas SPAK autorizoi përgjimin ambiental. Shuma e parave me numër serie u vendos në dispozicion nga ana e policisë, në mënyrë që pronari t’ia jepte punonjësve të IMT-së. Paratë u vendosën në dispozicion në një zarf dhe u tërhoqën nga njëri prej punonjësve.
Tre të tjerët e prisnin në një lokal ngjitur me objektin. Policia organizoi operacionin, ku brenda në lokal ishin të dyshuarit. Tre prej tyre u ndaluan, ku njëri u vendos në pranga konkretisht Gerald Fuçia, pasi vetëm për të u gjetën prova në momentin që u vëzhguan kamerat dhe u panë përgjimet ambientale.
Ndërsa në kërkim u shpall Klajdi Zhilla. Ky i fundit mori shumën prej 1000€, ku pasi konstatoi prezencën e policisë e fshehu shumën në banakun e lokalit. Policia ushtroi kontrolle dhe pasi vëzhgoi kamerat e sigurisë, gjeti paratë.
Hetimet po ndiqen nga prokurori Sotir Kllapi, teksa GJKKO pritet të caktojë datën për zhvillimin e seancës për masën e sigurisë. Të dyshuarit akuzohen për veprën penale “korrupsion pasiv”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
