Opozita po kërcënon procesin e shumëpritur të çeljes së negociatave me Bashkimin Europian. Kjo ishte ajo çka theksoi kryeministri Rama në mbledhjen e sotme të Asamblesë së PS-së, ku po analizohet puna e qeverisë në 100 ditët e para të mandatit të dytë. Duke iu rikthyer seancës së fundit të Parlamentit për vitin 2017, kur u zgjodh kryeprokurorja e përkohshme, Rama tha se ajo që ndodhi në sallë ishte shprehja kulmore e dëshpërimit se reforma në drejtësi po bëhet përditë e më e pandalshme.
“Jemi në kushtet kur po kërcënohet një arritje e madhe: çelja e negociatave me BE. Po kërcënohet nga brenda Shqipërisë, nga frika e reformës në drejtësi. Kjo mund t’i sjellë Shqipërisë një dëm i jashtëzakonshëm. Strategjia e zgjerimit, që publikohet në shkurt, hedh poshtë të gjitha parashikimet se Shqipëria nuk do të jetë pjesë e saj. Ky është një stacion që duhet të konfirmojë vullnetin tonë për të mos e komprometuar nga brenda vendit. Kjo është e paimagjinueshme në historinë e kalimit të vendeve ish-komuniste në familjen e vendeve të BE-së. Nuk ka kohë njeri të merret me ne nëse ne vetë i hapim vetes një gropë mu në pragun e shtëpisë”, tha ai.
Rama tha se opozita, pjesë e të cilës është tashmë edhe ish-aleatja LSI, i është rikthyer sërish çadrës. “Ne jemi në kushtet kur opozita e konsoliduar si kamp kundër reformës në drejtësi janë rikthyer në çadër, me të njëjtat kërcënime dhe qëndrim: moslejimi i çuarjes përpara të reformës në drejtësi”, tha ai.
Rama tha se qëndrimi në lidhje me reformën në drejtësi ishte arsyeja e prishjes së projektit të së majtës së bashkuar, falë të cilit PS-ja bashkëqeverisi me LSI-në në mandatin e parë.
“Ne rrezikuam qeverinë, por nuk lejuam të rrezikohet ecuria e reformës. U përpoqëm ta mbajmë gjalë Aleancën për Shqipërinë Europiane dhe projektin e së majtës së bashkuar, por pa kompromentuar reformën në drejtësi. Pikërkisht qëllimi ynë për të mos e komprometuar reformën në drejtësi ndau rrugët tona me aleatin qeverisës. U arrit një marrëveshje dhe baza e saj ishte që çadra të mbyllej dhe ata të vinin e të votonin vetingun. Pastaj të gjitha të tjerat me radhë. Ne ia dolëm duke pasur mbështetjen popullore për një reformë që e duan jo vetëm votuesit tanë, por edhe ata që nuk na votojnë, por edhe mbështetjen e partnerëve ndërkombëtarë. Pas kalimit me sukses të një mali të lartë të ngritur artificialisht në rrugën e Shqipërisë duke kërcënuar me një proces të cunguar zgjedhor, u gjendëm para akuzës se ne e kemi shkelur marrëveshjen. Ne jemi në kushtet kur opozita e konsoliduar si kamp kundër reformës në drejtësi janë rikthyer në çadër, me të njëjtat kërcënime dhe qëndrim: moslejimi i çuarjes përpara të reformës në drejtësi”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
