Mes tensionesh nga protesta e PD, konstituohet Këshilli i ri bashkiak me kryetare Brisela Kadia, reagon Basha (VIDEO)

Shkodra tashmë është me një Këshill të ri Bashkiak.

Është zgjedhur me 47 Vota kryetare e këshillit bashkiak Shkodër,  Brisela Kadia, ndërsa dy vota kanë qenë të pavlefshme. Po kështu janë zgjedhur edhe tre nënkryetarët e Këshilli Bashkiak. Ata janë Arvid Osja, Tereze Brigja dhe Suada Selimaj.

Kryetarja e Re ka thënë se do të jetë e drejtë dhe e paanshme.

" Ky këshill fillon punë në një situatë të pazakonte, ku disa parti kanë lënë jashtë votuesit e tyre. Do të punojmë për të gjithë. Kjo detyrë që më është besuar do të jem e drejtë dhe e paanshme ne të drejtë të ligjit për të shërbyer për Shkodren dhe shkodranët" ka thënë ndër të tjera Kadia.

Kreu i Partisë Demokratike, Lulzim Basha, ka reaguar pas tensioneve në Shkodër dhe kur mbledhja e konstituimit të Këshillit Bashkiak kishte përfunduar.

Në një reagim në Facebook, Basha shkruan se beteja në Shkodër është beteja e çdo shqiptari. Më tej numri një i opozitës tregon dhe qëllimin e protestave, ku shkruan se duan që t’i nxjerrin nga zyrat e luksin politikanët dhe tu vënë prangat.

POSTIMI I BASHES

"Beteja e sotme në Shkodër është beteja e çdo shqiptari që nuk pranon dhunën, hajdutërinë dhe kriminelët e Edi Ramës, nuk pranon papunësinë, padrejtësinë dhe arrogancën e Hajdutit Psiqik.

Qëllimi ynë është t’i nxjerrim këta banditë dhe hajdutë nga institucionet, nga parlamenti, nga bashkitë e pushtuara dhunshëm, t’i nxjerrim nga lokalet dhe hotelet luksoze, t’i nxjerrim nga studiot e mediave të kapura, t’i nxjerrim nga ekonomia, e t’i çojmë para ligjit. Tu vëmë prangat dhe t’i pastrojmë institucionet dhe rrugët e Shqipërisë, të pastrojmë ekonominë shqiptare nga këta banditë dhe hajdutë dhe t’ua kthejmë Shqipërinë njerëzve.#ShqipëriaSiEuropa #HajdutiPsiqik #RamaIk", 

Ndërkohë gjatë mbledhjes, përfaqësuesja e PD dhe kryetarja e qarkut të Shkodrës, Greta Bardeli edhe pse është lejuar paqësisht që të hyjë brenda ambienteve ku po konstituohet Këshilli Bashkiak i Shkodrës, është ngritur në mes të mbledhjes dhe ka hedhur akuza ndaj Partisë Socialiste dhe mbledhjes që po organizohet.

" Kjo është mbledhje ilegjitime. Keni shkelur me këmbë për 45 vite qytetin tim. Do mbani përgjegjësi jo vetëm kushtetuese por edhe penale. Është turp" ka thënë Greta Bardeli.

 Konstituimi i Këshillit bashkiak në Shkodër/ Nisin tensionet mes protestuesve dhe policisë

Ndërsa në Bibliotekën e Universitetit të Shkodrës është duke u konstituuar këshilli monopartiak i bashkisë, jashtë saj qindra qytetarë janë duke protestuar.

Kësisoj, raportohet se kanë nisur përplasjet e para mes policisë dhe militantëve të Partisë Demokratike në Shkodër.

Mbështetësit e PD duan të hyjnë brenda ambienteve të universitetit, aty ku po zhvillohet mbledhja e Këshillit dhe konstituimi i këtij këshilli.

Ata duan të hyjnë brenda, ndërkohë që në gatishmëri janë edhe Forcat e Ndërhyrjes së Shpejtë për të mos lejuar çarjen e kordonit.

  Shkodra sot proteston kundër këshillit bashkiak ilegjitim, PS ndryshon vendin e ceremonisë së konstituimit 

Prefekti i Shkodrës, pavarësisht se Valdrin Pjetri, i zgjedhur si kreu i Bashkisë Shkodër nga zgjedhjet e 30 qershorit dha dorëheqjen, ka thirrur për sot mbledhjen për konstituimin e Këshillit Bashkiak.

Ky vendim është kundërshtuar nga Partia Demokratike, e cila e ka quajtur antikushtetues dhe një manovër për të uzurpuar Bashkinë Shkodër.

Kësisoj, Partia Demokratike, dega Shkodër, do të mbajë sot në orën 10:00, para Prefekturës, një protestë paqësore për mbrojtjen e vlerave të demokracisë e të dinjitetit tonë si qytetarë të Shkodrës.

PD ka deklaruar se ne nuk duhet kurrsesi të pranojmë konstituimin e një këshilli ilegjitim e aq më pak në rektoratin e Universitetit “Luigj Gurakuqi”.

“Aty ku krejt pranë, 30 vite më parë jemi mbledhur të gjithë pa asnjë ndasi politike,të majtë e të djathtë për rrëzimin e regjimit komunist, pikërisht vendin që me 2 Prill, 4 dëshmorët e Demokracisë e lanë me gjakun e tyre e ku qindra të tjerë u plagosën.

Rilindasit zgjodhën ish-Komitetin e partisë për të konstituar këshillin ilegjitim vetëm për të provokuar qytetarët e Shkodrës. Ne nuk mund të pranojmë të jemi dëshmitarë të vendosjes së një tjetër regjimi.

I bëjmë thirrje Edi Ramës të mos luajë me zjarrin, të mos luajë me Shkodrën! Shkodra do të dijë sërish t’i dalë për Zot vetes. Prandaj i ftojmë të gjithë të bashkohen me ne,për dinjitetin e qytetit tonë,për dinjitetin e Shkodrës!” përfundon thirrja e PD.

Ndërkohë merret vesh se është ndryshuar vendi ku do të mbahet mbledhja. Mësohet se se konstituimi do të mbahet pranë bibliotekes së Universitetit të Shkodrës. me fillim prej orës 11.