Rusia dhe Bjellorusia bashkë për të kapërcyer sanksionet perëndimore

Në fund të një vizite në Minsk, presidenti rus Vladimir Putin tha se Rusia dhe Bjellorusia po punojnë ngushtë për të zbutur efektin e sanksioneve perëndimore kundër të dy vendeve.

Duke folur në një konferencë shtypi me homologun e tij Bjellorus, Alexander Lukashenko, Putin tha se "Rusia dhe Bjellorusia po punojnë së bashku për të kapërcyer hapat dhe sanksionet e paligjshme kundër Rusisë dhe Bjellorusisë" dhe "po punojnë me besim të madh në këtë drejtim. Vendet tona janë aleatët më të afërt dhe partnerët strategjikë".

Ai tha se kishte një planifikim të përbashkët të mbrojtjes midis Rusisë dhe Bjellorusisë dhe se Rusia "do të bëjë gjithçka për sigurinë e përbashkët të vendeve tona".

"Masa të tilla janë të nevojshme për shkak të situatës së tensionuar në kufijtë e jashtëm të shtetit të Bashkimit," tha ai - një referencë e dukshme për konfliktin në Ukrainë dhe ndoshta marrëdhëniet e këputura të të dy vendeve me Poloninë.

Putin konfirmoi se Rusia aktualisht po kryen stërvitje ushtarake në territorin e Bjellorusisë dhe se Rusia dhe Bjellorusia gjithashtu po zhvillojnë së bashku armatimin.

Forcat ruse janë vendosur në Bjellorusi për pjesën më të madhe të vitit. Në tetor, ministria e mbrojtjes e Bjellorusisë tha se 9,000 trupa ruse po lëviznin në vend si pjesë e një "grupimi rajonal" të forcave për të mbrojtur kufijtë e saj.

Avionët luftarakë rusë janë të stacionuar ose vizitojnë shpesh disa baza ajrore të Bjellorusisë. Sipas zyrtarëve ukrainas, disa nga sulmet e fundit me raketa të lundrimit në Ukrainë kanë origjinën në Bjellorusi.

Putin tha se Rusia mbetet investitori më i madh në Bjellorusi, në shumën prej rreth 4 miliardë dollarësh.

Nga ana e tij, presidenti i Bjellorusisë, Aleksandër Lukashenko tha se viti 2022 ka qenë një rekord për marrëdhëniet ruso-bjelloruse në të gjitha nivelet dhe pretendoi se "sanksionet kishin një efekt të dhimbshëm bumerang mbi iniciatorët e tyre".