Shitet në ankand për 630 mijë dollarë kapelja e përdorur nga aktori Harrison Ford

Kapelja e përdorur nga aktori Harrison Ford në pjesën e dytë të filmit ‘Indiana Jones’ është shitur për gati gjysmë milioni paund në ankand.

Kapelja me ngjyrë kafe e krijuar posaçërisht për filmin Temple of Doom, arriti të enjten në Los Angeles për 630,000 dollarë (487,000 £).

Artikuj të tjerë të kujtimeve të filmit u shitën në të njëjtën kohë, duke përfshirë rekuizita nga prodhimet e Star Wars, Harry Potter dhe James Bond.

Jones, një arkeolog aventurier, shihet me kapelen në fillim të filmit ku ai dhe shokët e tij hidhen nga një avion që rrëzohet në një trap të fryrë.

Gjatë skenës, ai është në bordin e një avioni me këngëtaren e klubit të natës Wilhelmina "Willie" Scott, e luajtur nga Kate Capshaw, dhe mikun e tij 12-vjeçar Short Round, i luajtur nga Ke Huy Quan, ndërsa po i shpëtonte kthetrave të një bande kriminale kineze.

Pasi fluturimi sabotohet nga piloti, treshja përdorin trapin për të rënë nga avioni, përpara se të rrëshqasin poshtë një mali.

Shtëpia e ankandeve tha se kapelja u përdor gjithashtu gjatë fotografimit shtesë në objektet e efekteve vizuale të producentit George Lucas.

Gjithashtu në ankand u shit një përkrenare skautiste perandorake e përdorur në filmin e Star Wars të vitit 1983 Return Of The Jedi, i cili u ble për 315,000 dollarë (243,000 £), si dhe një shkop ndriçues i përdorur nga Daniel Radcliffe në Harry Potter, i cili tërhoqi një ofertë fituese prej 53,550 dollarë (41,400 £).

Ndërkohë, një kostum i veshur nga Daniel Craig në filmin Skyfall të James Bond të vitit 2012 u shit për 35,000 dollarë (27,000 £).