Nikolin Janina ka dalë para drejtësisë në Spanjë, ku u arrestua tre vjet më parë si lideri i një grupi kriminal që merrej me trafikun e heroinës, morfinës dhe opiumit në disa shtete të botës.
Mediat spanjolle, të cilat raportojnë për seancën e mbajtur në gjykatën e Valencias, e përshkruajnë si një njeri të përgatitur për dosjen në mënyrë të përkryer, i qetë dhe i vendosur për t'iu përgjigjur të gjitha pyetjeve që do t'i bëheshin.
Në Shqipëri, Janina ka në pronësi kompaninë e madhe të hidrosanitareve, Porcelanosa. Ai ka jetuar mes Valencias dhe Tiranës përgjatë 30 viteve të fundit. Janina akuzohet për koordinimin e një prej ngarkesave më të mëdha të heroinës në vitet 2010 (më e madhja në Evropë në kohën e sekuestrimit) dhe gati 54 kilogramë të tjera të sekuestruara në një Porsche Cayenne në vitin 2016 në Tui.
Sipas mediave vendase, në seancën dëgjimore, përfaqësuesi ligjor i Janinës paraqiti dokumentacion të ri, duke iu përgjigjur secilës prej pyetjeve të bëra nga Zyra e Prokurorit Publik. Janina ka dhënë përgjigje për të gjitha pyetjet, derisa u pyet për mesazhet, që policia dyshon se ai dërgoi nëpërmjet një Blackberry pas konfiskimit të drogës në Galicia. Ai ka mohuar t’i ketë dërguar mesazhet.
Ndërsa në lidhje me marrëdhënien e tij me Castor M., një banor i Mos, i dënuar si porositësi i 54 kilogramëve heroinë të sekuestruar nën rrotat e Cayenne, Janina ka thënë se ajo ka ardhur pas prezantimit nga një mik i përbashkët. Udhëtimin e tij në Galicia, që policia pretendon se ai bëri për të koordinuar dërgesën e drogës, ai e ka cilësuar si pjesëmarrje në festën e 20-vjetorit të mikut të tij nga Mos me familjen e tij.
Lidhur me dy takime të tjera midis të dyve, në të cilat policia pohon se janë diskutuar çështje që lidhen me drogën, Janina deklaroi se ato ishin udhëtime pune që lidheshin me kompanitë e saj të blerjes dhe shitjes së materialeve të ndërtimit – “Porcelanosa” në Shqipëri dhe një tjetër në Spanjë - dhe, në rastin e Barcelonës, ai u shoqërua nga arkitektë shqiptarë në një udhëtim të organizuar me mbështetjen e kompanisë që familja e tij ka në pronësi edhe sot.
Hetimet tregojnë se në Barcelonë, ai u takua me Rinush G., njeriun që pak kohë më pas do të nisej për në Holandë për një sasi të madhe. Lidhur me këtë, ai tregoi se ishte prezantuar me të nga miku i tij Castor, si shqiptar që jetonte në Katalonjë. "Unë kurrë nuk kam qenë i përfshirë në biznesin e drogës dhe tema e drogës nuk është diskutuar kurrë në praninë time. Duhet të jem shumë i qartë për këtë."
“Diario de Pontevedra” raporton se Janina e pati të vështirë të përgjigjej kur prokurori dhe, më vonë, edhe sekretari i gjykatës, paraqitën si prova bisedat në Blackberry, një sistem që trafikantët e drogës e konsideronin të sigurt në atë kohë. Në bisedë, ai e pyeste Castorin për Rinushin kur ngarkesa sekuestrohej, si dhe për vetë substancën, gjithmonë sipas interpretimit të policisë për kodin e përdorur.
Hetuesit thonë se dyshimet e para lindën kur mësuan se Castor M. po merrte sasi të mëdha heroine nga trafikantët shqiptarë të drogës. Kjo i bëri ata ta ndiqnin atë së pari në Baiona, ku identifikuan Janinën, dhe më pas në Barcelonë dhe Malaga, ku i panë sërish të dy. Janina përballet me një dënim të mundshëm me tetë vjet burg.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
