Aksidenti me vdekjen e dy fëmijëve, pezullohen nga detyra drejtuesit e policisë Durrës

Pas aksidentit me pasojë vdekjen e dy të miturve dhe plagosjen e një tjetri, të ndodhur mesditën e së dielës në Durrës, janë pezulluar nga detyra drejtuesit e policisë së këtij qarku.

Drejtori i Përgjithshëm i Policisë së Shtetit Skënder Hita, në zbatim të Rregullores së Policisë së Shtetit, ka pezulluar nga detyra, për performancë të dobët në përmbushjen e detyrave:   

 -Drejtorin e Drejtorisë Vendore të Policisë Durrës, Drejtues Afrim Tafa;           

-Zëvendësdrejtorin për Rendin dhe Sigurinë Publike të DVP Durrës, Kryekomisar Zija Sulaj; 

-Shefin e Sektorit të Policisë Rrugore të DVP Durrës, Kryekomisar Kreshnik Skëndo.            

Gjithashtu, menjëherë pas ngjarjes, Drejtori i Përgjithshëm i Policisë së Shtetit urdhëroi Drejtorinë e Policisë Rrugore për të ngritur një grup ekspertësh të cilët shkuan në vendngjarje  për të analizuar shkaqet dhe rrethanat e aksidentit.       

Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor për të vlerësuar nëse ka apo jo përgjegjësi në radhët e punonjësve të policisë, për këtë rast.