Jeff Bezos: 10 miliardë dollarë për të luftuar ndryshimin e klimës

Bosi i Amazon-it Jeff Bezos ka premtuar 10 miliardë dollarë për të ndihmuar në luftimin e ndryshimit të klimës.

Njeriu më i pasur në botë tha se paratë do të financojnë punën e shkencëtarëve, aktivistëve dhe grupeve të tjera.

"Unë dua të punoj së bashku me të tjerët për të forcuar mënyrat e njohura dhe për të eksploruar mënyra të reja të luftimit të ndikimit shkatërrues të ndryshimit të klimës", tha ai.

Në llogarinë e tij në Instagram, Bezos u shpreh se fondi do të fillojë me shpërndarjen e parave këtë verë.

Z. Bezos ka një vlerë neto të vlerësuar prej më shumë se 130 miliardë dollarë që do të thotë se ka ofruar rreth 8% të pasurisë së tij. Ai gjithashtu po financon programin hapësinor “Blue Origin”, i kritikuar për gjurmën e tij të karbonit.

Në krahasim me disa multimiliarderë, Z. Bezos ka bërë vetëm filantropi të kufizuar. Dhurimi i tij më i madh përpara këtij premtimi mendohet të ketë qenë 2 miliardë dollarë në shtator të vitit 2018 për të ndihmuar familjet e pastreha dhe për të financuar shkollat.