Rusi, arrestohet gazetarja që filmoi videon e fundit të Alexei Navalny-t gjallë

Gazetarja e cila filmoi videon e fundit opozitarin rus Alexei Navalny para se të vdiste, Antonina Favorskaya, është arrestuar nga policia ruse.

Favorskaya mbuloi gjyqet e Navalny për disa vite dhe organizata për lirinë e medias Reporterët pa Kufij tha të enjten se ajo ishte një nga gjashtë gazetaret në të gjithë vendin që u ndaluan këtë muaj.

Autoritetet ruse e arrestuan Favorskaya të mërkurën vonë duke e akuzuar për pjesëmarrje në një “organizatë ekstremiste” duke postuar në platformat e mediave sociale të Fondacionit Kundër Korrupsionit të Navalny, tha grupi rus i të drejtave të njeriut OVD-Info.

Zëdhënësja e Navalny, Kira Yarmysh, tha se Favorskaya nuk publikoi asgjë në platformat e fondacionit dhe sugjeroi që autoritetet ruse ta synonin atë sepse ajo po bënte punën e saj si gazetare.

OVD-Info tha se Favorskaya fillimisht u arrestua më 17 mars pasi vendosi lule në varrin e Navalny.

Ajo kaloi 10 ditë në burg pasi u akuzua për mosbindje ndaj policisë, por kur periudha e paraburgimit përfundoi, autoritetet e akuzuan përsëri dhe e urdhëruan që të paraqitej të premten në Gjykatën e Qarkut Basmanny të Moskës, tha OVD-Info.

Favorskaya është një nga disa gazetare ruse të shënjestruara nga autoritetet si pjesë e një goditjeje gjithëpërfshirëse kundër disidencës në Rusi.

Dy gazetare të tjera, Alexandra Astakhova dhe Anastasia Musatova, u ndaluan përkohësisht pasi shkuan për të takuar Favorskaya në qendrën e paraburgimit ku ajo po mbahej, thanë Reporterët pa Kufij.

Ekaterina Anikievich, e faqes ruse të lajmeve SOTAvision dhe Konstantin Yarov nga RusNews, u arrestuan gjithashtu nga policia ndërsa mbulonin kontrollin e shtëpisë së Favorskaya.

Fondacioni Kundër Korrupsionit i Navalny është cilësuar si një organizatë ekstremiste nga autoritetet ruse, që do të thotë se njerëzit e lidhur me të mund të përballen me dënime me burg.