"Forcat e Deklaratës për Liri dhe Ndryshim", një grup organizatash që kanë koordinuar demonstratat kundër qeverisë sudaneze muajt e fundit, kanë refuzuar grushtin ushtarak të shtetit që rrëzoi presidentin e Sudanit, Omar al Bashir, duke thënë se këshilli i përkohshëm i propozuar përmban po ato fytyra kundër të cilave është ngritur populli.
Në një deklaratë, grupi u shpreh se grushti ushtarak i shtetit thjesht “ka ricikluar të njëjtat fytyra dhe institucione ndaj të cilave janë ngritur në revoltë njerëzit tanë.”
"Ata që rrënuan vendin tonë dhe masakruan qytetarët e tij duan t’ia pinë këtij vendi edhe pikën e fundit të gjakut dhe duan t’ia vjedhin djersën që çdo sudanez ka derdhur për këtë vend në revolucionin e lavdishëm popullor”.
Forcat e Deklaratës për Liri dhe Ndryshim refuzojnë kategorikisht të bëhen pjesë e këtij grushti shteti dhe i ftojnë njerëzit që ta vazhdojnë revolucionin, duke qëndruar nëpër rrugët e Sudanit, derisa të vendoset një qeveri civile e përkohshme që paraqet vullnetin e revolucionit.
Presidenti i vendit, Omar al-Bashir u rrëzua me grusht shteti ushtarak pas tri dekadash në pushtet, duke mbyllur kështu një kapitull të errët të historisë sudaneze të mbushur me rebelime të armatosura, kolapse ekonomike, luftë civile e terrorrizëm. Ai u arrestua nga forcat ushtarake dhe mbahet në arrest shtëpie.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
