Ndërhyrja në kompjuterët e SPAK, dërgohen për gjykim tre persona

Gjykata e Posaçme ka dërguar për gjykim tre persona të akuzuar se kanë ndërhyrë në sistemet kompjuterike të prokurorëve të posaçëm të SPAK.

Vendimi u mor në seancën paraprake të zhvilluar më 6 mars 2026, pas kërkesës së paraqitur nga Prokuroria e Posaçme kundër Korrupsionit dhe Krimit të Organizuar (SPAK).

Sipas njoftimit zyrtar, SPAK kishte paraqitur më 13 janar 2026 pranë gjykatës kërkesën për dërgimin në gjyq të procedimit penal nr. 277/1/1 të vitit 2025, në ngarkim të tre të pandehurve: Arnold Rrokaj, Zambak Gjoni dhe ish-drejtori i Burgjeve Agim Ismaili.

Në përfundim të shqyrtimit të pretendimeve të palëve, gjyqtari Paulin Çera vendosi pranimin e kërkesës së prokurorisë dhe kalimin e çështjes për gjykim në themel.

Sipas akuzës së ngritur nga SPAK, i pandehuri Arnold Rrokaj akuzohet për veprat penale “Hyrja e paautorizuar kompjuterike” dhe “Përgjimi i paligjshëm i të dhënave kompjuterike”, të kryera në kuadër të një bashkëpunimi në formën e një grupi të strukturuar kriminal. 

Përveç këtyre veprave, ndaj tij rëndojnë edhe akuzat për pjesëmarrje në “grup të strukturuar kriminal” dhe “kryerje të veprave penale nga organizata kriminale dhe grupi i strukturuar kriminal”.

Ndërkohë, të pandehurit Zambak Gjoni dhe Agim Ismaili akuzohen për veprën penale të “Përgjimit të paligjshëm të të dhënave kompjuterike”, gjithashtu të kryer në bashkëpunim në kuadër të një grupi të strukturuar kriminal.

Sipas prokurorisë, veprimtaria e tyre dyshohet të jetë zhvilluar në bashkërendim me njëri-tjetrin, në formën e bashkëpunimit kriminal të organizuar.

Në seancën paraprake, dy prej të pandehurve, Arnold Rrokaj dhe Zambak Gjoni, kanë kërkuar që çështja e tyre të shqyrtohet me procedurën e gjykimit të shkurtuar, një procedurë që parashikon ulje të dënimit në rast se gjykata i shpall fajtorë. 

Ndërsa i pandehuri Agim Ismaili do të përballet me proces gjyqësor me procedurë të zakonshme.