Opozita ka vendosur që protesta e nesërme para Kryeministrisë të nisë prej orës 18 të pasditës, por përfundimi eventual i saj nuk është bërë i ditur ende.
Bazuar në paralajmërimet se protesta e 13 prillit do të jetë po aq madhore në pjesëmarrje sa ajo e 16 shkurtit, policia ka filluar marrjen e masave konkrete për ruajtjen e objektit të Kryeministrisë.
Kamera sigurie, dron, agjentë civilë, mbi 1500 efektivë policie, automjete të hedhjes së ujit si dhe Garda e Republikës do të jenë të angazhuara si plan i masave për të monitoruar dhe ndërhyrë në çdo moment nëse protesta e opozitës do të eskaloj në të dhunshme.
Paraditen e sotme janë pastruar kamerat e sigurisë për të pasur një fokusim të qartë. Për të shmangur ngjitjen e protestuesve, shtyllat janë lyer me graso, ndërsa është vendosur mbrojtësja te dera e jashtme e Kryeministrisë, por edhe rrethimi me gardh metalik.
Pjesë e masave të policisë pritet që të jetë edhe bllokimi i qarkullimit në rrugën 'Ismail Qemali', 'Ibrahim Rugova' lidhje me bulevardin, ura e Lanës nga Ministria e Brendshme deri te Presidenca, aty ku do të ndalohet dhe parkimi i mjeteve.
Kjo do të jetë protesta e tretë para Kryeministrisë dhe e teta në total e organizuar nga PD-ja me LSI-në, duke shtuar edhe tubimet para parlamentit gjatë seancave plenare.
Opozita kërkon largimin e kabinetit "Rama", qeveri kalimtare dhe zgjedhje të parakohshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
